Gutuna: "Zer ezkutatzen dute Altzaten?"
Azken asteetan Altzateko lanen inguruan mugimendu susmagarriak ikusi ditugu. Lur eremu horretan zenbat eta gehiago zulatu, orduan eta gehiago azaleratzen da bertan dagoen kutsadura. Zulo horietan likido beltz distiratsua ikusi dugu; horretaz gain, hodi malguekin substantzia bat botatzen dute likido beltzaren gainera; presiozko pistolaz hondotik ateratzen diren harriak garbitzen ari dira; azkenik, milaka tona lur eta harri ari dira kanpotik ekartzen.
Honek guztiak gure susmo okerrenak egiaztatu ditu. Hau da, Altzate oso kutsatua dago. Bere momentuan esan ziguten, baita udalek ere, eremu hori garbitu zutela, jada ez zegoela kutsatua. Denborak arrazoia eman digu. Altzaten eraiki nahi dituzten etxeak substantzia kutsagarriak eta arriskutsuak dituen eremu baten gainean eraikiko dira, aurrera jarraitzen badute.
Egoera honek kezka handia eta galdera asko sortzen dizkigu: ba al dakite Oreretako eta Lezoko udalek zer gertatzen ari den Altzaten? Lanen jarraipena egiten al dute? URA agentziari eta Eusko Jaurlaritzaren Ingurumen Sailari jakinarazten al diete zer gertatzen ari den? Zeinek hartuko du bere gain proiektu honek ekarriko dituen kalteen erantzukizuna? Zoritxarrez, gure ustez, herritarrengandik hurbilen dauden instituzioek beste aldera begiratzen dute, azken finean, interes espekulatibo handiak daude tartean, haienak ere bai. Berriro ere, herritarren osasuna eta ongizatea bigarren mailan geratzen dira.
Duela gutxi, Iñaki Antiguedad eta Ane Zabaleta hidrologoek artikulu interesgarria argitaratu dute uholdeen eta hirigintzaren inguruan. Ez legoke gaizki gure gobernariek irakurriko balute eta ondorio egokiak aterako balituzte. Baina, badakigu zementuaren politikaren mendean daudela. Honek guztioi ondorio txar bikoitza ekartzen digu: etxebizitzaren arazoa ez dute konpontzen, eta eremu naturalak zementuz betetzen dizkigute, jarduera horiek ekarriko dituzten ondorioak kontuan hartu gabe, jasaten ari garen klima-aldaketa areagotzen dutenak.
Santi Angulo. Altzate Bizirik plataformaren izenean