[Argazki galeria] Mintzodromo jendetsua, Euskararen Egunaren harira

120 lagun bildu dira, Galtzaraborda kiroldegiaren kafetegian. Udal Euskaltegiko eta Xenpelar AEK-ko ikasleak izan dira mahaien bueltan eta dinamizatzileen laguntza izan dute, goi mailako urratsetako ikasleek aukeratutako gaietaz mintzatzeko.

Ikerne Zarate

Errenteria-Orereta

2015/12/03

Mintzalaguna

Euskararen Egunaren harira Mintzodromoa egin dute Lau Haizetara Euskaltzaleon Topagunearen, Xenpelar AEKren eta Udal Euskaltegiaren eskutik hamarnaka euskara ikasleek. Guztira 120 lagun bildu dira Galtzarabordako kiroldegiaren kafetegian. Udal Euskaltegiko eta Xenpelar AEK-ko ikasleak izan dira mahaien bueltan eta dinamizatzaileen laguntza izan dute, goi mailako urratsetako ikasleek aukeratutako gaiez mintzatzeko. Alkohola, atez ateko bilketa sistema, sare sozialak, pobrezia, kirola, Gabonetako loteria, aldaketa klimatikoa… eguneroko gaiez hitz egin dute, hori bai, denek euskaraz. Hasierako mailetako ikasleek berriz, aurkezpenak egiten aritu dira. Euskararen Egunak, gainera, euskaldun berriei egin die aitortza. Ez da gutxiagorako, esfortzu handia egiten dute egunero euskaraz bizi ahal izateko, eta Mintzodromoaren antolatzaileek argi esan dute, “beraiek dira protagonistak”. Ordubete izan dira Mintzodromoan euskararen aldeko apustua berresten ikasle horiek guztiak. Bi esperientzia Josu Anton Mintzodromoan izan da. Euskara ikaslea da, AEKn goi urratsean dabil, C1 mailan EGAren baliokide, eta sei urte daramatza euskaldun oso bihurtu nahian. Astelehenetik ostegunera zortzi ordu ematen ditu euskaltegian, eta horrez gain, Mintzalaguna egitasmoan hiru ordu ematen ditu astean. “Euskara ikasi nahi dut, erabili. Horretarako gogoa izan dut txikitatik. Lanean ibili naizen bitartean ez dut aukerarik izan ikasteko, orain jubilatuta nago eta horretara jarri naiz”. Ikasteko gogoa, euskaraz bizitzeko nahia, “eta ikaskideen artean dugun giro politak” mantentzen duela euskaltegian esan du Antonek, “artalde jatorra gara”. Euskararen Egunean aitortza euskaldun berriei egitea ez zaio bereziki garrantzitsua iruditzen, “niri balio behar zait euskara ikastea eta hori da aitortza, nola sentitzen dudan nik. Nire asmo bakarra euskaraz egitea da, ez egitea gazteleraz, eta bide horretan ari naiz”. Zailena irratian esaten direnak ulertzea da Antonentzat, eta Errenteria-Oreretan euskara erabiltzeko aukera asko ez bada ere, “nik badut erabiltzea nire inguruan”. Carolina Toron ere izan da Mintzodromoan. Asturiarra da eta orain hiru urte heldu zen Euskal Herrira. Iritsi eta berehala erabaki zuen euskara ikasten hastea eta Udal Euskaltegian C1 mailan dabil. Astelehenetik ostegunera 10 orduz izaten da euskara ikasten euskaltegian. “Jendea ezagutzeko erabaki nuen euskara ikasten hastea, integratzeko aukera ematen dizulako hizkuntza ikasteak, eta baita kultura ezagutzekoa ere”. Izugarri berezia dela euskara esan du Toronek, “ikasteko garaian berezia da, baina aberasgarria ere”. Euskararen Egunaren harira euskaldun berriei egiten duten lana eta esfortzua aitortzea garrantzitsua da bere ustez. Errenteria-Oreretan euskara erabiltzeko hainbeste aukera ez dagoela aitortu du, baina horretarako espazioak bilatzen ditu Toronek. Zailena, berriz, ez itzultzea dela esan du, “euskaldun berrientzat urrats handia da jariotasuna hartzeko gazteleratik euskarara ez itzultzea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.