Lehen sorospenerako arreta eskola curriculumean txertatuko du Orereta Ikastolak
Hori egingo duen Euskal Herriko lehen ikastetxea izango da Orereta Ikastola. Emergentziak Osakidetza erakundearen eta EHUren Donostiako Medikuntza eta Erizaintza Fakultatearekin elkarlanean ari dira.
Ostiralean egin zuten agerraldia. Lehen sorospenerako arreta eskola curriculumean txertatuko du Orereta Ikastolak. Hori egingo duen Euskal Herriko lehen ikastetxea izango da aurreko ostiralean jakinarazi zuenez. Emergentziak Osakidetza erakundearen eta EHUren Donostiako Medikuntza eta Erizaintza Fakultatearen ezinbesteko aholkularitzari eta laguntzari esker emango duela pausua jakinarazi zuen ostiraleko agerraldian Anartz Muxika Andresek, Orereta Ikastolaren zuzendariak.
Lehen sorospenak eskola curriculumean txertatzeko ikastetxeko komunitate osoa inplikatu eta ahalduntzea izan dela gakoa azaldu zuen Muxikak: “Talde eragile bat osatzea izan da lehen pausua. Talde eragile hori ikastolako osasun munduko hainbat gurasok eta zenbait langilek osatzen dute”. Lehenik, lehen sorospenerako formazio sakona jasoko dute horiek Emergentzia Osakidetzako profesionalen eskutik, eta hori eginda, talde eragile hori izango da ikastolako langile guztiak eta DBHko ikasleak formatuko dituena. Ikastolako eraikin bakoitzean gainera, desfibriladore bana jarriko dute (bost denera) eta suspertzea nola egin ikasteko 30 panpina erosi. Ikastolako eraikin bakoitzerako ekintza protokoloak ere idatziko dituzte eta horren arduradunak izendatu, “beharrezkoa den kasuetan nola jokatu eta zein pausu eman jakin ahal izateko”, azaldu du zuzendariak.
Horrela eskatzen duten gurasoek gainera, formazioa jasotzeko aukera izango dute datorren ikasturtetik aurrera.
Otsailean formazioa
Ikasturtero egingo dutela prozedura hori zehaztu dute. Horrela, formazio iraunkorra eta eguneratua bermatuko dute. Otsaila hasieran jasoko du formazio saio sakona Emergentziak Osakidetzaren eskutik talde eragileak, eta hori amaituta egingo dute langile eta ikasleen formazioa. Ikasturte amaierarako bukatzea aurreikusi dute arduradunek. Prozesu guztian, Oiartzo Batxilergo Ikastolak ere parte hartuko duela azaldu du Muxikak.
Eusko Jaurlaritzako Osasun Sailak eta Osakidetzak hainbat saiakera egin dituztela herritarrak osasun arretan ahalduntzeko nabarmendu zuten ostiraleko agerraldian bildutakoek, “kontzientzia hartu eta norbere burua nahiz ingurukoak laguntzeko eta artatzeko aukera ematen du horrek. Garrantzitsua da hori jendarte arduratsu eta solidarioa eraikitzeko”.
Lehen sorospenerako arreta eskola curriculumean txertatzea horren guztiaren gehigarri eta osagarri da Muxikaren esanetan, “pausu bat gehiago”. Prozesua dokumentatu egingo du Medikuntza eta Erizaintza Fakultateak, nahi duen ororen eskura jartzeko.
Orereta Ikastolaren aspaldiko asmoa zela horrelako zerbait egitea esan dute arduradunek, “bizitzarako ikasleei eskain diezaiekegun gauzarik garrantzitsuenetakoa baita osasun arreta formazioa”. Eskerrak eman dizkie Muxikak Emergentziak Osakidetza eta Medikuntza eta Erizaintza fakultateari “beren laguntzagatik”, eta ikastolako komunitateari “inplikazioagatik. Elkarlanik eta komunitatearen gabe ezin izango zen proiektua aurrera atera”.
