Portuko trafikoa % 7,4 hazi da lehen lauhilekoan

Txatarra eta autoen trafikoak igo egin dira gehien

olatz mitxelena

2015/05/11

Pasaiako portuan, lan eskaintza

Siderurgia produktuen trafikoa da garrantzitsuena Pasaiako portuan, nahiz eta iazko lehen lauhilekoarekiko produktu horien trafikoa % 7,35 jaitsi den. Aitzitik, txatarraren inportazioa asko hazi da, eta horretan oinarrituta, siderurgia-produktuen trafikoa hurrengo hilabeteetan suspertu egingo dela aurreikusi dute portuko arduradunek. Autoen trafikoari dagokionez ere, baikorra da Portu Agintaritza. Esan dutenez, 2014ko trafikoekiko diferentzial positiboa hilabetez hilabete handituz doa. Aurten 250.000 unitate inguru mugituko dituztela aurreikusi dute, eta zehaztu dutenez,”krisi aurreko urteetako trafiko- bolumenaren batez-bestekotik gertu” dago kopurua. Paperaren eta egur-pastaren trafikoa % 19,2 hazi dela iragarri dute baita ere, 2011z geroztik izandako gainbeherari pixkanaka buelta emanez. Zerealentzako tokirik ez Zerealen trafikoari dagozkion datuak, berriz, ez direla hain onak nabarmendu dute Portu Agintaritzako iturriek. % 55,38 jaitsi da aipatu trafikoa, eta jaitsieraren bi azalpen eman ditu Agintaritzak; alde batetik, 2014ko inportazioak penintsulan izandako uzta txarraren ondorio izan zirelako esan dute, eta bestetik, Pasaiako Portuak zerealak biltegiratzeko espazio falta duela esan dute. Arrantza-trafikoa % 8,9 hazi da, eta datua ez da hain txarra, alturako flotaren deskargak apirilean % 39 jaitsi direla kontuan hartuta. Inportatutako salgaien jatorriari dagokionez Erresuma Batua eta Herbehereak dira lehen bi herrialdeak, eta esportazioei dagokionez ere, salgai gehienak Erresuma Batura esportatu dituzte –20.000 tona, lehen lauhilekoan–. Beraz, esportazioen helmuga nagusiena Erresuma Batua izaten jarraitzen duela nabarmendu du Portuak, bigarren herrialdetik oso urrun. Belgika da gaur gaurkoz bigarren herrialdea, eta hara 59.000 tona eraman dituzte epe berean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.