'Gure genealogia feministak liburua' aurkeztuko dute gaur ilunabarrean (19:00etan), udaletxeko areto nagusian
Iratxe Retolaza, Edurne Epelde eta Miren Aranguren
liburua aurkeztuko dute gaur ilunabarrean (19:00etan), udaletxeko areto nagusian. Iratxe Retolaza Gutierrezek, Miren Aranguren Etxartek eta Edurne Epelde Pagolak (Euskal Herriko Bilgune Feminista eta Emagin) Euskal Herriko mugimendu feministaren historia bildu dute eta horren nondik norakoak azaltzeko Aranguren eta Epelde hurbilduko dira gaur Oiartzuna udaleko Feminismo sailak antolatuta.
Bihar HITZAren papereko edizioan Miren Arangureni egindako elkarrizketa argitaratuko da. Hona hemen aurrerapen bat:
Nola aldatu da mugimendu feminista 50 urte hauetan?
Antolakuntza aldetik berritasun iraunkor bat egon da mugimendu feministan. Hasierako asanbladan oinarritutako antolakuntza batetik pixkanaka berregokitzen joan da behar berrietara, emakumeen interes desberdinetara, egitura desberdinetara… XXI. mendetik aurrera aldaketa handi bat ikusten dugu militantzia ulertzeko moduetan, saretzeko eta antolatzeko moduetan, teknologia berrien eraginez, militantzia modua ere auzitan jartzen da. Feminismoa ez da bakarrik mugimendu feministari dagokion zerbait edo talde antolatuei dagokiona baizik eta eremu eta zirrikitu guztietatik hedatu den ikuspegi bat bat, jarduteko modu bat eta lan egiteko era bat. Beraz, talde feministez gain, gaur egun feminismoa toki askotan ikusten eta jorratzen da. Borroka feministari aldaketa nagusi hori ikusten diot.
Liburuan bildutako istorioren bat gogoan duzu?
Sorpresa handi bat hartu genuen Trikipunk deitutako talde batekin. Antzerki talde bat zen eta pixkanaka trikitixa hartzen hasi ziren, alboka, panderoa eta horrelako instrumentu tradizionalak eta garai horretan punkan sona zuten abestiak bersionatzen hasi ziren. Ekimen feminista askotan hartu zuten parte. Baserritarren jantzi antzekoekin janzten ziren, baina plastikoz eginda eta oso oso jarrera probokatzailea zuten. Ez zuten urte asko iraun. Gaur egun galdetzen digutenean emakumez osatutako taldeen inguruan beti Vulpes etortzen zaigu burura, edo Belladona, eta hauek topatu genituenean poza hartu genuen. Modu xelebrean ekintza feminista probokatzaile bat aurrera eramaten zuten; adibidez, ia-ia txortan egiten zuten plastikozko bidoi batekin. Horrelako talde gehiago egongo ziren ziurrenik. Mugimendu feministarena ezkutatuta egon den istorio bat da.
