Udaberri Festa antolatu du biharko Txabol Sotoak; haurrak izango dira egun batez protagonista Pasaia-Lezo Lizeoko gurasoek «familia giroan, euskaraz gozatzeko» antolatu duten jaian.
![Udaberri Festa, Txabol Sotoa](http://oarsoaldea.hitza.eus/site/files/2015/05/UdaberriFesta-300x187.jpg)
Ikastolak Udaberri Festarako zabaldutako irudia
Udaberrian loreak bezala, hala, proportzio berean hazten da kultur jardueren produkzio maila urte sasoi honetan Pasai Antxon.
Alkartasunaren kultur hamabostaldia hastear da, Antxoberfest pasatu berri, Luzuriaga Martxan Eguna, Marealta auzolanean garbitzekoa… Eta horien guztien artean bada beste klasiko garrantzitsua, bere txikitasunean handia dena:
Txabol Sotoak urtero antolatzen duen Udaberri Festa.
Biharko antolatu dute aurten jaia, egun osokoa. Itziar Oteiza, Eli Mintegi, Ander Esnaola eta Iñigo Rubert ari dira, besteak beste, antolakuntzan, eta beraiek azaldu dituzte aurtengo egitarauaren nondik norakoak.
Festa, ohi bezala, Gure Zumardian izango dela zehaztu dute, eta egitaraua eguerdia aldera abiatuko dela, festarako baliatuko duten karparen inguruan. Esan dutenez, puzgarriak izango dira txikienentzat, eta, baita, nola ez, buruhandiak. Horrez gain, aurten haurrek murala margotzeko aukera izango dutela nabarmendu dute antolatzaileek.
Zer jan ere ez da faltako. Eguerdian edariak eta pintxoak zerbitzatuko dituzte, eta ondoren, herri bazkaria izango da, haurrena lehenengo eta ondoren helduena.
Arratsalderako, berriz, haur eta helduentzako jolasak eta dantzaldi «aparta» iragarri dituzte, Jai Alai taldearekin. Txolokate jatea ere izango da, eta bukatzeko, «saski eder» baten eta bazkari baten zozketa.
Jaiaz zer espero duten galdetuta, antolatzaileek argi dute erantzuna: «Jendeak parte hartzea. Haurrak beti daude jolasteko prest, baina gurasoei ere ematen diegu aukera jolasteko. Guretzako oso garrantzitsua da haurrek ikustea beren gurasoek parte hartzen dutela eta ondo pasatzen dutela elkarrekin jolasten, herri giroko jai batean».
Ikastolatik kalera
Pasaia-Lezo Lizeoaren guraso taldea da Txabol Sotoa, baina bere jarduna kalean garatzen da nagusiki, herritar orori zabalik. Taldeko kideek azaldu dutenez, lanerako hiru ardatz nagusi ditu taldeak: herrian familia giroa sustatzea, euskararen erabileran eragitea eta haurrei espazioak ematea. «Helburua da, batez ere, familian gozatzeko moduko festa antolatzea, guraso eta haurrak elkarrekin ondo pasatzeko», zehaztu dute.
Udaberri Festa jai euskalduna izanik, bestetik, helburu bikoitza erdiesten dute Txabol Sotokoek, haurrei ikastolatik kanpo euskaraz bizitzerik badela erakutsiz, eta trebatzen ari diren helduei, berriz, euskaraz egiteko espazioak erraztuz. «Euskaraz mintzatzea, bizitzea, jolastea, hori da helburua, eta hori guztia familia giroan egitea, haurrak eta gurasoak batera».
Txabol Sotoaren jarduna, baina, ez da Udaberri Festara mugatzen. Urte osoan zehar antolatu ohi dituzte gauzak, eta beti egiten dute berritasunak txertatzeko ahalegin bat. «Lehengo urtean, adibidez, Olentzerola egin genuen, eta oso arrakastatsua izan zen», gogoratu dute.
Familia piloa animatu zen haurrekin batera Olentzeroak egitera, horretarako propio antolatutako tailerretan, eta ondoren, eskuz sortutako Olentzero horiek guztiak San Tomas Eguneko azokan erakutsi zituzten.
Txabol Sotoaren beste klasikoa, haurrentzako Urtezaharreko Krosa da, «urtetik urtera handitzen ari dena». 300 haur inguruk parte hartu zuten iazko ekitaldian.
Jaietan topagune
Txabol Sotoaren beste data erreferentziala San Fermin Jaiak izaten dira. Urteak dira gurasoek txosna antolatzen dutela, eta txosna horren inguruan haurrei begirako egitarau oso bat osatzen du.
«Sanferminetan lortzen dugun diruarekin urtean zehar egiten dugun guztia finantzatzen dugu», azaldu dute. Baina, txosnak ez du bakarrik ekonomia helburu. Haurren Eguneko egitaraua bere gain hartzen dute Txabol Sotokoek, eta beren txosna izaten da festetan haurrentzako antolatutako jarduera gehientsuenen erdigunea.
«Orain dela urte batzuk ez zen txosna muntatu lanerako jendea lortzeko zailtasunak zeudelako, eta hutsunea igarri egin zen» gogoratu dute. Egunero hamabost bat lagun behar izaten dituzte lanerako, 75 bat lagun guztira. Aurten uste dute txandak osatzeko arazorik ez dutela izango, baina auzolanera biltzeko deialdia egiteko aukera ez dute alferrik galdu nahi izan: «Jende berria behar dugu. Oso gustura aritzen gara, baina laguntza behar dugu. Jendea etortzea nahiko genuke. Lana da, baina oso gustura egiten dugun lana», goraipatu dute.
Haurrak protagonista
Erronkak gustuko dituzte Txabol Sotokoek, eta aurrerantzean «haurrei protagonismo gehiago ematea» lortu nahiko lukete, «haurrei ere kaleaz jabetzeko aukera eman».
Bide horretan urratsak nola egin hausnartzeko dute oraindik, baina inguruko herrietako esperientzietan badituzte erreferenteak, «Oreretako haurren jai batzordea kasu».