'Oroimena Bizigune' dokumentala eta webgunea aurkeztu dituzte
Errenteria-Oreretan izandako indarkeria-ekintzak eta giza eskubideen urraketen gaineko herritarren testigantzak jaso ditu gaur Donostian aurkeztu duten Oroimena Bizigune proiektuak.
Errenteria-Oreretan izandako indarkeria-ekintzak eta giza eskubideen urraketen gaineko herritarren testigantzak jaso ditu gaur Donostian aurkeztu duten Oroimena Bizigune proiektuak. Proiektu hori dokumentalean jaso da, baina ez du euskarri bakarra izango, izan ere, webgunea ere jarri dute martxan.
Sentsibilizaziorako, gizarte komunikaziorako eta oroimena eraikitzeko partaidetzazko dokumental proiektua dela zehaztu dute aurkezpenean Irusoingo ekoizlea den Iñaki Gonzalezek, Ubiqaco zuzendari Jose Luis Roncerok, Bizikidetzaren eta Giza Eskubideen Zuzendari Nagusia Maribel Vaquerok, dokumentalaren zuzendari Alaitz Arenzanak, eta proiektuan protagonista diren gazteek. Irusoin, Ubiqa eta Moviltik Elkarte Kulturala daude proiektuaren atzean.
Dokumentala Donostiako Antzoki Zaharrean proiektatuko dute bihar 19:00etan, eta ostegunean Bilboko Azkuna Zentroko Golem Zinemetan 12:00etan.
Euskal gizarteak gatazkaren gainean dituen iritziak eta testigantzak, sorkuntza narratibo eta ikus entzunezko kontaketekin osatutako prozesu parte hartzaile baten bidez aurkeztea du helburu proiektuak. Aurtengo otsaila eta martxoan egindako lantegiak ditu oinarri. “Errenteriako eta Oarsoaldeko beste herrietako bederatzi gaztek lan prozesu batean hartu zuten parte, eta eztabaida, hausnarketa eta mugikorren bidez grabatutako elkarrizketekin Errenteria-Oreretaren iragana ezagutu dute, herritarrek indarkeriaz eta herriak jasandako giza eskubideen urraketez eskainitako lekukotza eta iritziei esker”, azaldu dute arduradunek. Horretarako 100 elkarrizketa egin dituzte.
Kontaketa kolektiboa eta gatazkaren memoria eraikitzea du helburu proiektuak, “bakegintzaren kultura zein bizikidetzazko etorkizuna zabaldu, sendotu eta sakontzeko ekarpenak egitea”, zehaztu dute.
Esperientzia pilotua
Kontaketa digital berrietan eta herritarren partaidetzan eta konpromisoan oinarritutako esperientzia pilotua dela Oroimena bizigune proiektua ere esan dute sustatzaileek, “Errenterian hasi eta Euskal Autonomi Erkidegoko (EAE) gainerako udalerrietara zabaltzeko asmoarekin sortua da”. Lantegietan parte hartu duten bederatzi gazteek zehaztu dituzte herritarren elkarrizketetarako galderak, eta herritarrekin batera gazte horiek direla proiektuaren protagonista esan dute gaurko agerraldian.
Webgunean testigantzak bi modutan ikusi daitezkeela azaldu dute bestalde proiektuaren sustatzaileek, mosaikoa edota geokokatutako testigantzen mapa baliatu daitezke. Dokumentala berriz, hiru kamerekin grabatutako jarduera, elkarrizketa eta hausnarketa pertsonalekin osatu da. Ordubeteko iraupena du, eta indarkeria ekintzak zein giza eskubideen urraketak ezagututa iragan horretan sakondu dute protagonistek, “indarkeria, biktimak, sufrimendua, beldurra eta isiltasunaren jatorrien gainean, eta bakea eta bizikidetza hobetzeko eztabaida guneak sortzeko moduaz hausnarketa egin dute bertan”.
Proiektua Errenteriako Udala, Gipuzkoako Foru aldundia, Eusko Jaurlaritzaren Bakegintza eta Bizikidetzarako Idazkaritza Nagusia eta Kultura Saila, eta Donostia 2016 proiektuaren laguntzarekin ekoiztutakoa da. 
