Ane Asensio Telletxea oiartzuarrak hiru urrezko domina lortu ditu Euskal Herriko Slalom Txapelketan. Espainiakoan parte hartzeko txartela lortu du.
Ane Asensio, aitarekin.
Ane Asensio Telletxeak urrezko hiru domina irabazi ditu Altzako kiroldegian jokatutako gurpildun aulkiko Euskal Herriko Slalom Txapelketan. Erlojupekoan, kanporaketan eta taldekako probetan izan zen garaile Asensio, eta horrenbestez, gurpildun aulkiko Espainiako Txapelketarako txartela lortu du oiartzuar gazteak. Haurtzaro ikastolan ikasten du Anek, Haurtzaro Atletismo Taldeko kide da, eta ikastolako frontoian, entrenatzen duen lekuan, erantzun ditu Oarso Bidasoko Hitzaren galderak. Juan Luis Asensio, Aneren aita eta Haurtzaron entrenatzaile duen Itsaso Markosekin batera izan da Ane. Euskal Herriko Txapelketan lortutako emaitzei eta hiru urrezkoei ere ez die garrantzi handirik eman 14 urteko gazteak: «Gustuko dudana kirola egitea da, disfrutatzen dut horrekin, ongi pasatzen dut, dominak irabazi edo ez».
Garaipenak lortuta «pozik» jartzen dela gaztea esan du Aneren aitak, Juan Luisek. «Halere, ez dio garrantzi handirik ematen dominak irabazteari, kirola egitea nahikoa da beretzat», ziurtatu du. Bartzelonan jokatuko da Espainiako Slalom Txapelketa, Vilanova i La Geltru herrian, ekainaren 4an eta 5ean. Irrikaz da Ane bertara joateko. Gustuko duena egitera doala esan du oiartzuarrak, «kirola egiten ongi pasatzera», baina esperantza du maila ona emango duela.
Atletismoan iaz hasita
Betidanik egin nahi izan du kirola Anek, —«atletismoa bereziki», esan du Juan Luisek—, eta iaz hasi zen slaloma eta atletismoarekin. Kirolarekin aurretik ere izan du harremana gazteak, Mindara, dibertsitate funtzionala duten pertsonak artatzeko elkartean hasi zen kirol anitzeko ekintzak egiten. «Orain hiru urte hasi zen horretan eta horrela hasi zuen harremana kirolarekin», gogorarazi du Jose Luisek.
Haurtzaro Atletismo Taldean aritzeaz gain, Mindara elkartearen Kima proiektuaren barruan ari da orain gaztea. Juan Luisek azaldu duenez, programa horren bidez adinean aurrera doazen gazteei kirol jarduera normalizatua eskaini nahi zien Mindarak.
Ikastolako entrenatzailea du Itsaso Markos. Mindarako Jokin Garciarekin batera antolatzen dituzte Anerekin entrenamenduak: «Slaloma espezifikoa da, ez du edonork egiten eta 100 metroko atletismoa ere egiten du Anek, baina gurpildun aulkian. Bi espezialitate horietarako teknikak ez dira berdinak, eta horretarako trebatuak diren entrenatzaileen laguntza du».
Emaitza onak
Astean bitan entrenatzen du Anek, astelehenetan Haurtzaron eta ostegunetan Anoetan. Entrenamenduetan dena duela gustuko esan du, «kirola eta entrenamenduak jolasa dira niretzako».
Euskal Herriko Slalom Txapelketakoak ez dira oiartzuarrak lortu dituen emaitza on bakarrak. Aurreko larunbatean Durangon izandako 100 metroko atletismo proban ere fin aritu zen.
Gurpildun aulkiak kirola egiteko baldintzatzen duela argi du Juan Luisek, «kirola beste modu batera planteatu behar da. Batetik, gurpildun aulkian dabiltzan pertsona gutxik erabakitzen dute normalean kirola egitea, eta bestetik, aukera handiegirik ere ez zaie ematen, edo ez behintzat modu normalizatu batean». Beraien kasuan laguntza nahikoa dutela argi du. «Batetik Haurtzaro Ikastolan jasotzen duguna eta bestetik, Mindara elkarteak ematen diguna». Ezin direla kexatu dio, ikastolan «sentsibilitate berezia» baitute gaiarekin. Erakundeetatik laguntza edo babesa jasotzen duten galdetuta, «laguntza ez dagoela modu egituratuan antolatuta» erantzun du. «Lan handia egiteko dago oraindik. Herrialde batzuetan errazagoa da gurpildun aulkian dagoen edo bestelako elbarritasuna duten pertsonek kirola egitea, aukera hori izatea». Hemen hori egitea oraindik erraza ez dela ziurtatu du, erakunde eta federazioek ez baitute asko landu.
Kirolari izateaz gain, txikitatik omen du argi Anek ospetsu ere izan nahi duela. Emaitzei erreparatuta, badirudi, bide horretan kirolarekin asmatu duela. Gustura sentitzen da kirola egiten, gozatu egiten du, eta hori dela-eta bere egoera berean dauden pertsonak animatu nahi izan ditu kirolaren mundura hurbiltzera, «kirola egiten, ongi sentitzen zarelako».
