Hamarnaka lagun bildu dira Duintasuna jubilatu eta pentsiodunen elkarteak deitu duen elkarretaratze eta manifestaziora.
Duintasunaren manifestazioak herriko kaleak zeharkatu ditu.
Hamarnaka lagun bildu dira Duintasuna jubilatu eta pentsiodunen elkarteak deitu duen elkarretaratze eta manifestaziora. Pentsio publikoen alde egin du elkarteak eta Espainiako Gobernuaren jarrera salatu du Duintasunak, baina baita Eusko Jaurlaritzarena ere: “Azken horrek uko egin dio diru sarrerak bermatzeko errenta igotzeari nahiz eta legebiltzarraren lege batek horretara derrigortzen duen. Horrek ere eragiten du milaka pentsiodunen soldata osaketan”.
“Gobernuek instituzioez barre egiten duela” gaineratu du Duintasunak, “nahiz eta beraiek esaten duten instituzioetan dagoela herritarren subiranotasuna. Frogatuta dago subiranotasuna, boteretsuek dutela, eta baita gobernuak azken horien zerbitzura daudela”.
Elkarretaratzean Emakumeen Nazioarteko Egunari erreferentzia egin dio bestalde elkarteak, “berdintasunaren bidean pausuak eman baditugu ere, oraindik asko dugulako lortzeko. Horretarako borrokan jarraitu beharra dago, emakume askok jasaten dugun diskriminazio egoerak zuzendu eta gainditzeko”.
Adineko emakumeak aipatu ditu Duintasunak: “Emakume horiek bere bizitzan zehar lan zein baldintza ekonomiko txarrak jasan behar izan dituzte, edo familia zaintza lanetan jarduteagatik kotizatu ezin izan dutelako ez dute pentsio nahikorik zahartzaroa duintasunez bizi ahal izateko”. Duintasunaren iritziz adineko pertsonak eta emakumeak duintasunez bizi ahal izateko eskubidea bermatzea instituzio publikoen ardura da: “Gela batera sartzen garen bakoitzean argia itzaltzeko kezkarekin ez egotea, elikagai egokiak izateko aukera edukitzea, behar ditugun tratamendu, zerbitzu mediku eta botikak eskura izatea bermatzea dagokie”
Zahartzaroan autonomia mantendu ahal izateko etxebizitza egokituak izatea eta zerbitzu publiko duinak eskaintzea ere, instituzioen ardura dela esan du Duintasunak. Horren harira, 1080 euroko gutxieneko pentsioa exijitu du elkarteak.
Indarkeria matxistak hildako emakume guztiak ere gogora ekarri ditu, “hauen artean adineko emakumeak ere badira. Jasaten duten indarkeria eta honi aurre egiteko zein bertatik ateratzeko dituzten zailtasunak salatu eta agerian jartzea gure betebeharra da”.
Amaitzeko, gehien irabazten dutenek gehiago ordaindu eta enpresek bere irabazien zati bat berdintasuna eta ongizate soziala sustatzera bidera dezatela eskatu du.
