Errenteria-Oreretako 8.500 familiak baino gehiagok hartzen du parte bosgarren edukiontziaren sisteman.
Gracia eta Legorburu gaurko agerraldian. Argazkia: Herri Bizia
Beraun, Iztieta eta Galtzarabordan jarri ondoren, Kaputxinoak auzoan jarri berri du udalak bosgarren edukiontzirako poltsa konpostagarriak banatzeko makina. gaur eguerdian egin du agerraldia bertan, eta makinaren berri ematearekin batera, hondakinen kudeaketari buruzko azterketa soziologikoak utzitako datuak eman ditu jakitera.
Poltsak bertan hartzeko, ezinbestekoa dute erabiltzaileek bosgarren edukiontzian alta emanda egotea. Irakurgailuan jarri beharko dute txartel elektronikoa erabiltzaileek eta 40 poltsako sorta jasoko dute. Udalak egindako kalkuluen arabera, hamar aste iraun beharko luke kopuru horrek, lau poltsa asteko, “eta makinak hala zehaztuko du. Jasotzen dugun unean, hurrengo txanda noiz dagokigun zehaztuko du pantailan, eta ezingo dute erabiltzaileek data horren aurretik makinatik poltsa gehiago jaso”.
Poltsa horiek baina, udaletxeko beheko solairuan doan banatzen jarraituko dutela jakinarazi du udalak, makinetan banatzeaz gain.
Azterketa soziologikoa
Joan den urte amaieran inkestak egingo zituela udalak jakinarazi zuen. 400 lagunei egin zaie inkesta hori, eta bertatik hainbat datu atera ditu. Inkesta poltsa edota edukiontzietatik harago joan da eta parte hartu duten herritarrei, ingurumen arloan udala egiten ari den politikaz, edukiontziez, eta dagoen pertzepzio sozialaz galdetu dute, besteak beste.
Errenteria bizileku gisa hartuta “oso balorazio ona” egin dutela inkesta erantzun duten herritarrek azaldu dute Jose Cruz Legorburu Ingurumen zinegotziak eta Eñaut Graciak Komunikazio eta Parte Hartze zinegotziak: “10 puntutik batez beste 7,96 puntu eman dituzte. Herrikide izatearen harrotasuna nabaritu da balorazio horretan”. Udal kudeaketari 6,54ko nota eman diote , eta ingurumenari, berriz, 6,67. Herritarren artean, kontzientzazio maila altua erakutsi duela inkestak gaineratu dute. Hobekuntzarako tarte handia ikusi dute, hala ere. Hondakinak botatzeko ezarrita dagoen ordutegia ez dela errespetatzen uste du %70ak.
Hobari fiskalei dagokienean bosgarren edukiontziaren gaineko ezagutza ia erabatekoa badute ere, edukiontzi marroia erabiltzeagatik udalak %25eko hobaria ematen duela lautik batek baino ez daki, hau da, %25ak. Birziklatzearen gaineko jarrera positiboa dutela errenteriarrek erakutsi du inkestaren emaitzak, bestalde, “%79,5a neurri berriak hartzearen aldekoa da, eta %75,5a ordutegiak errespetatzearen aldekoa”. Herritarren %74,6ak gainera, bere burua inguruarekin nahiko edo oso konprometitua ikusten du.
Errenteria-Oreretako 8.500 familiak baino gehiagok izena eman dute bosgarren edukiontziaren sisteman.
