[Bideoa] Xabier Leteren poemak bildu ditu Koldo Izagirrek
'Elurra ikusi dut' izenburupean, poemak kronologikoki antolatu eta Leteren bilakaera erakusteko irakurketa kritiko bat egin du Izagirrek.
“Leteren munduak aztertu ditut eta nire irizpide literario partikularraren araberako antologia bat egin dut. Nire laborategian sartu, eta dakidan apurra Leteren obraren alde jarri nuen, jarrera kritikoa baztertu gabe”. Hala azaldu zuen atzo Koldo Izagirrek bere lana, liburuaren aurkezpenean.
Leteren poemak eta kantu hitzak bildu ditu Koldo Izagirrek Elurra ikusi dut antologian. 1960 eta 1970eko hamarkadetako kantu esanguratsuenetatik hasi eta Egunsentiaren esku izoztuak (Pamiela, 2008) azken poema bildumaraino.
Antologiaren sarrera Izagirrek berak idazti du, lanaren aurkezpen gisa, eta jarraian Leteri buruzko kronologia sintetizatu bat jaso du. Hirugarren atalean dator antologia bera, garai bakoitzari dagozkion letra eta poemekin. Leteren poesiaren azterketa bat ere egin du Izagirrek, bere obran kezka existentziala oso gai garrantzitsua dela berretsiz.
Eresbilen, harribitxiak
Antologia osatzeko, Izagirrek, besteak beste, Eresbil Musikaren Euskal Artxiboan topatu dituen letra batzuk baliatu ditu, argitaratuak izan ziren modutik desberdinduak.
Aitzitik, Xabier Leteren funtsa ez du ikertzerik izan. Aldundiarena da, eta Koldo Mitxelenan jasota dute. Bertan kontsulta egiteko eskabidea bete zuen Izagirrek uztailean, baina atzo barkamen eske deitu zioten arte ez du erantzunik izan. Koldo Izagirrek horren berri ematen du antologiaren azken orrialdean.
