Aitzol Gogorza eta Mikel Arrieta gaixotasun larri eta sendaezinak dituzten bi preso oreretarrak etxera ekartzea eskatzeko zita berria egin du Orain Presoak Dinamikak.
Orain Presoak dinamikaren barruan antolatutako bizikleta martxa Errenteria-Oreretara heldu zeneko irudia.
Aitzol Gogorza eta Mikel Arrieta gaixotasun larri eta sendaezinak dituzten bi preso oreretarrak etxera ekartzea eskatzeko zita berria egin du Orain Presoak Dinamikak. Datorren igandean, hilak 16, egingo dute eta kirolaren bidez zabalduko dute aldarria lau haizetara. Zehazki, handball erakustaldia antolatu dute 10:00etatik aurrera.
Egun berean argazki erraldoira deitu dituzte herritarrak Gogorza eta Arrieta etxeratzea eskatzeko, 13:00etan izango da azken hori, eta aurretik photocalla ere jarriko du dinamikak nahi duen orok atxikimendua eman dezan.
Nahasmen obsesibo konpultsiboa eragiten dion buruko gaitza du Gogorzak, autolisi arrisku handiarekin. Azken urteetan hainbat aldiz ospitaleratu behar izan dute Basurtoko erietxean bere egoeraren ondorioz. Egun Basauriko espetxean dago. Arrietari, joan den urteko urtarrilean diagnostikatu zioten espondilartropatia kroniko seronegatiboa Algecirasko Campo Gibraltar ospitaleko sendagileek. Endekapenezko gaixotasun larri eta sendaezina da. Botafuego (Algeciras, Espainia) espetxean aurkitzen da, Euskal Herritik 1.100 kilometrora.
Hamaika izan dira bi errepresaliatu oreretarrak etxeratzearen alde egin duten elkarte, eragile eta norbanakoak, eta beste hainbeste bizi duten egoera salatu eta etxean izan behar dutela esateko antolatu diren iniziatibak. Joan den uztailean, Orain Presoak dinamikak
bizikleta gainera igo zuen euskal presoen aldeko aldarria, tartean, larri gaixo dauden presoen egoerari irtenbidea ematea eskatzeko.
Lau ditu eskaerarik behinenak Orain Presoak dinamikak: Euskal presoen urruntzearekin amaitzea, astebururo ehunka senide beste hainbeste kilometro egitera behartzen dituelako, sufrimendua eraginez; Larri gaixo dauden presoak etxeratzea, “behar bezala arta ditzaten eskubidea dutelako”; Frantzia eta Espainiako estatuetako zigorren batuketa egitea Europako Legediak dioen moduan; eta lehen graduen aldaketa, “euskal presoek lehen graduan betetzen dutelako zigorraren %100, eta hori legearen kontrakoa delako”.
