[Galeria] Indartsu hartu dute kalea

Euskal Herrian emakumeek batez beste, gizonek baino %41 gutxiago kobratzen dutela salatu du Duintasunak gaur, eta pentsio publikoen sistema bermatzea eskatu.

Ikerne Zarate Gartziarena

Errenteria-Orereta

2018/10/01

Duintasunak manifestazio jendetsua egin du.

Udako atsedenaldiaren ostean, indartsu itzuli dira gaur berriz ere kalera jubilatu eta pentsiodunak. Duintasunak deituta, hamarnaka eta hamarnaka lagun bildu dira Herriko plazan. Gaur egun berezia dute gainera, Adineko pertsonen Nazioarteko Eguna, eta ozen aldarrikatu dute zahartzaro duinerako eskubidea. Horretarako ezinbestekotzat jo ditu Duintasuna elkarteak, pentsioen sistema publikoa, Europako Gutun Sozialak aholkatutakoari jarraituz gutxienezko 1.080 euroko pentsioa genero bereizketarik gabe, eta KPI errealaren araberako igoera legez bermatzea. Jasangarritasun faktorea bertan behera uztea da beste eskaeretako bat, baita genero arrakalarekin amaitzea: “Euskal Herrian emakumeek batez beste, gizonek baino %41 gutxiago kobratzen dute”. Aurretiko erretiroak ez zigortzeko eskatu dute bestalde, eta argi utzi dute ez dutela ontzat emango pentsio publikoen sistema deuseztatu eta laguntza sistema bihurtzea. Gaurko egunarekin bat eginda, gainera, zaintza sistema publikoa eta anitza galdegin dute bildutakoek adinekoak izanik dependentzia egoeran dauden lagunentzat, “eta publikoa diogu, askotan, zaintza horiek familia edota emakumeen ardurapean gelditzen direlako”. Aberastasuna badagoela berretsi du gaur ere, haren banaketa desegokia omen gakoa, eta datu bat ere eman dute: “Espainiako Estatuak Europako inguruko estatuek baino lau puntu gutxiago gastatzen ditu pentsioetan, 46.000 miloi euro urteko. Aberastasuna oso gaizki banatuta dago eta aberats eta pobreen areko arrakala etengabe doa handitzen. Bankuak erreskatatzeko dirua dagoen bitartean, edota obra publiko handi-mandiak egiteko, pentsioetarako ez dagoela diote”. Beste datu bat eman du Duintasunak: Gaur erretiroa hartu duen pertsona baten erretiroa, duela urtebete kargu, lan eta soldata bera zuen pertsona baten erretiroa baino baxuagoa izango du. Hilabeteko 40 euro gutxiago jasoko ditu. Gauzak horrela, belaunaldi gazteenei mezua bidali die, “pentsioena guztiei dagokigu, guztiei eragiten digu, belaunaldi arteko arazoa izango da, eta ez badugu guztion artean gelditzen, okerrera egingo du nabarmen. Kontzientzia hartzea ezinbestekoa da”. Elkarretaratzea amaitzeko, Donostiara deitu ditu Duintasunak herritar guztiak. Gipuzkoako Helduen Elkarteen plataformak antolatuta manifestazioa egingo dute larunbatean (hilak 5) Alderdi Ederretik abiatuta 17:30ean: “Beharrezkoa da denok egotea bertan, jubilatu eta pentsiodunak, langileak, langabeak, eta gazteak, belaunaldiartekoa da deialdia, pentsioen etorkizuna guztion ardura delako”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.