Errigoraren kanpaina berria martxan da
'Bost urte maite duguna elikatzen' leloarekin hasi zuen Errigorak kanpaina atzo. Errenteria-Oreretan herritar talde baten eskutik heldu da Errigoraren kanpaina, eta atzo aurkeztu zuten Xera Gastrotekan, baita dastaketa egin ere.
Errigora kanpaina aurkeztu zuten atzo Xera Gastrotekan dastaketa batekin. Bost urte maite duguna elikatzen leloarekin hasi zuen Errigorak kanpaina atzo. Errenteria-Oreretan herritar talde baten eskutik heldu da Errigoaren kanpaina, eta atzo aurkeztu zuten Xera Gastrotekan, baita dastaketa egin ere. Hilaren 22ra arte, oliba olio birjina estra, kontserbak 12 ontziko sortetan eta arroza (online bakarrik) eskatu ahal dituzte interesdunek, ekologikoak eta ez ekologikoak, baita Errigoraren kamisetak ere. Jaso, berriz, bi txandatan egingo da, eta ordainketa produktuak jasotzeko unean. Olioa eta kamisetak apirilean jaso eta ordaindu beharko dituzte eskatzaileek, eta kontserbak eta arrozak, maiatzean.
Pikillo piperrak, zainzuriak, orburuak, barazki menestra, potxak, tomate frijitua, eta kremak daude aukeran, ekologikoak eta ez ekologikoak kontserben barruan. Eskaerak online egiteko aukera dago, baina modu horretan egitea ezinezkoa dutenek, Errigoraren eskaera orria bete eta Lau Haizetara Euskaltzaleon Topagunearen (Pablo Iglesias kalea, Topoko geltokiaren parean) egoitzan entregatu beharko dute kanpainaren epearen barruan.
Bosgarrenean ere, bertakotasuna, auzolana, burujabetza eta komunitatea dira Errigoraren kanpainaren oinarriak, horiek guztiak elikatzen daramalako bost urte. Tokiko produktuak merkaturatzen ditu Errigorak, beren txikitasunean ekonomiaren bertokiratzea sustatuz eta auzolanean ehundu ditu sareak bost urte hauetan guztietan. Denbora horretan, Nafar Hegoaldeko uzta eskutik eskura kanpainaren lehen ediziotik 240.000 litro olio eta 700.000 ontzi kontserbatik gora banatu dituzte. Iaz, 6.500 sukaldetan egin zuten bat kanpainarekin: “Zenbakietatik harago, ordea, maite duguna elikatzea da kanpaina honen balio nagusia”.
Errenteriaz gain Oarso eta Bidasoko beste herrietan ere egin daiteke eskaera: Oiartzunen, Elorsoro kiroldegian, Intxixu AEKn, Haurtzaro Ikastolan, eta Labore Oiartzunen; Pasaian, Basari Elkartean eta Pasaia-Lezo Lizeoan; Hondarribian, Olagarro elkartean; eta Irunen, EKT elkartean.
