Erresidentzietako gatazkaren sozializazio eguna egin du ELAk
Adinekoen egoitzetako langileek 50 egunetik gora daramatela borrokan nabarmendu zuten atzoko sozializazio egunaren amaiera ekitaldian. Greba luzatzearen arrazoia argia dago ELA sindikatuarentzat atzo salatu zuenez, "emakumeak zaretelako da, emakumeon lan baldintzak bigarren mailakotzat jotzen dituztelako".
Greban diren ELAko erresidentzietako langileek sozializazio eguna egin zuten atzo. Gipuzkoako erresidentzietakko gatazkaren sozializazio eguna egin zuen atzo ELA sindikatuak Oarsoaldean eta Bidasoan. Horrela, kartelak itsatsi, pankartak jarri, eta informazioa buzoneatu zuten bi eskualdetako herrietan, eta Errenteria-Oreretako Foru plazan amaitu zuten eguna.
Adinekoen egoitzetako langileek 50 egunetik gora daramatela borrokan nabarmendu zuten atzoko sozializazio egunaren amaiera ekitaldian. Greba luzatzearen arrazoia argia dago ELA sindikatuarentzat atzo salatu zuenez, “emakumeak zaretelako da, emakumeon lan baldintzak bigarren mailakotzat jotzen dituztelako”. Gogor salatu zuten bildutakoek, zaintza lanak ez euela beharrezko aitortza sozial eta ekonomikoa, “etxean doan egiteaz gain, lan arloan modu prekarioan egitea nahi dute”.
Grebaren atzean dagoen arrazoia ere azaldu zuten, “lan baldintza duinak lortu nahi ditugu, lanaldi partzialak, lan karga izugarriak, eta soldata arrakalarekin amaitu nahi dugu. Ez al da nahikoa arrazoi?”. Feminizatu gabeko beste sektore batzuekin ere egin zuten alderaketa: 6.000 euro gutxiago kobratzen dituzte urtean zaintza lanetan aritzen direnak.
Diputazioaren jarrera gogor kritikatu zuten, “modu hipokritan” jokatzea leporatu zioten, “politika feministak bultzatzen ari direla esaten dute, baina politika feministek pertsonak erdigunean jartzen dituzte, zaintza lanak aitortzen ditu, kalitatezko zerbitzu publikoak eskaintzen ditu, eta soldata arrakalaren kontra aktiboki borrokatzen dira. Ez dira nahikoak hitz onak eta Martxoaren 8an kalera ateratzea”. Gizarte eredua jokoan dagoela nabarmendu zuen, gainera, ELAk, eta zaintza langileen borrokak garrantzi handia duela gizarte osoarentzat erantsi zuen, “asko dugu jokoan”.
Diputazioari “gezurretan” aritzea leporatu dio ELAk
Gogor salatu du sindikatuak aldundiaren jarrera. Azken horri, “gezurretan” aritzea eta agiri bat “faltsifikatzea” egotzi dio: “Onartezina da instituzio batek horrela jokatzea, marra gorri guztiak pasa ditu. Patronalarekin akordio batera iristea eskatu zigun aldundiak; Adegi eta Matiarekin akordio bat egin genuen, eta dokumentua aurkeztu aldundiari. Aldundiak ordea, ez du finantzatu nahi, gure adinekoak zaintzeko diru gehiegi suposatzen duela diolako. Kontu bat ados ez egotea da, eta bestea guk bidali genion akordioarekin egin duena, faltsifikatzea, alegia. ELAren logoa jarri diote eta proposamen bat baino ez dela esan dute”.
Aldundiaren jokaera salatu, eta gertaera sozializatzea erabaki duela erantsi zuen ELAk, “eta horretarako heri gehienetara, herritar gehienetara heldu behar dugu”. Helburua ez dela hauteskunde kanpainan esku hartzea edo eragitea esan zuen, “gure helburua da, larritasunaren maila markatzea, jendeak garrantzia eman diezaiola gure politikoen egiteko moduei”.
