Kultur Aniztasunaren Mundu Egunaren harira adierazpen instituzionala egin du udalak
Bide luzea udalak egin duena, baina oraindik ere egitekoa badagoela nabarmendu du adierazpenean, eta hainbat konpromiso hartu ditu. Errenteriako elkarte eta norbanakoei esker ona azaldu die egunero egiten duten lanagatik.
Udaletxeko balkoian kultur aniztasunaren aldeko pankarta zintzilikatu dute gaur. Argazkia: Herri Bizia Kultur aniztasunaren Mundu Eguna da gaur, eta horren harira, adierazpen instituzionala egin du Errenteriako Udalak. 2001. urtean onartu zen aho batez Unescoren Kultur Aniztasunaren gaineko adierazpena, eta horrek, gizateriaren ondare komuntzat jotzen du kultur aniztasuna. Altxor bizi hori babestu eta “tentaldi segregazionista eta fundamentalista” oro saihestea du helburu.
Kultur aniztasuna gizateriaren ondare baldin bada, Errenterian dagoen aniztasuna kontuan hartuta, Errenteriak ondare handia duela esan du udalak adierazpenean, “gure aberastasuna, gure altxorrik handiena, gure jendea eta gure elkarteak dira, agintaldi honetan Errenteriako Udalarekin batera elkarbizitzarako aliantzaren prozesuaren bidea egin dutenak”.
Errenteriak, aniztasunaren handitasuna aitortu egiten duela eta herria toki justu, kohesionatu eta sozialago izan dadin lanean ari dela erantsi du udalak, “desberdinak elkarrekin bizi eta elkarren artean erlazionatzeko tokia izan dadin”.
Horren harira aipamen berezia egin dio udaletik egindako lanari. “2015ean Kultur Aniztasuna, garapenerako Lankidetza eta Giza Eskubideak azpiatala sortu genuen; 2016ko maiatzaren 21ean Kultur Aniztasunaren Mundu Eguna ospatu genuen lehenengoz Errenterian; 2017an hainbat elkarteren topagune den elkarbizitzarako mahaia jarri genuen abian, eta horrek asko algundu digu gure politiketan kultur aniztasunaren zeharkako ikuspegia kontuan hartzen; 2018an Herri aliantza egin genuen sektore ezberdinekin, eta kulturarteko bitartekaritza zerbitzua jarri dugu abian”. Aurten bertan, Elkarbizitzarako eta Gizarte Ekintzako Kontseilua onartu du udalak.
Bide luzea egin duena, baina oraindik ere egitekoa badagoela nabarmendu du adierazpenean, eta hainbat konpromiso hartu: Errenteriako elkarteak aktibatu eta haiekin batera lanean aritzeko konpromisoa hartu du onartu berri duen Elkarbizitzarako eta Gizarte Ekintzako Kontseiluan. RECI Kulturarteko Hirien Europako sarearekin elkarlanean aritzeko konpromisoa ere hartu du, 2020-2021 urtean sareko partaide izan ahal izateko. Kultur Aniztasuna azpisaila handitzeko baliabide ekonomiko zein giza baliabide gehiago esleitzea da beste konpromisoa.
Azkenik esker ona azaldu die Errenteriako norbanako eta elkarte guztiei “erakutsi duten konpromisoarengatik” eta egunez egun egiten duten lanarengatik, “Errenteria herri hobea, justuagoa eta kohesionatuagoa izan dadin”.
