Ez daudenengatik hartu dute kalea ikasleek
Indarkeria matxistaren kontrako egunean, ez daudela beldurrean hezteko prest esan dute ikasleek; Ikamak eta Zirikak deitu dute protestara.
Manifestazioa gaur eguerdian Ikama eta Zirikak deituta. Arduraz eta indarkeria matxista ezabatzeko prest. Horrela atera dira kalera ikasleak Azaroaren 25ean, indarkeria matxistak bidean utzi dituen emakume guzti-guztien ahotsa bihurtuta. 12:00etan abiatu da manifestazioa Herriko Plazatik Erdialdeko kaleak zeharkatu eta abitutako puntu berean bukatzeko. Gogotik ari zuen euria ez da oztopo izan jendarte feminista justu baten aldarria lau haizetara zabaltzeko. Eguerdiko protesta hori, Ikama ikasle antolakundeak, eta Zirika Neska Gazte taldeak deitu dute.
Eraso matxistak eguneroko albiste direla salatu dute gazte horiek, “ez dira egoera isolatuak, sistema zisheteropatriarkalaren berezko izaera baizik”. Horren aurrean, emakumeen kontrako indarkeria “modu zabalean” landu beharra jarri dute nabarmen, “indarkeria matxistak hainbat espazio eta egoeretan gertatzen baitira”. Horiek albiste badira, indarkeria matxista “desnaturalizatzea” lortu dutelako izan dela ere esan dute, “normala deitzen zuten hura, ez da jada hain normala”. Bidea luzea da, baina urratsa egin, egin dituzte.
Ikasleak izanik, hezkuntza sistemari erreparatu diote baieztatzeko indarkeria matxista “bortitz” azaltzen dela eramu horretan: “izan ere, gizonek diseinatutako hezkuntza eredu batean, arau horietatik kanpo bizi garenontzat, ikastetxeak ez dira espazio bizigarriak”. Horrela, hainbat adibide jarri dituzte baieztapen hori indartzeko, “edukietan nagusi dira gizon boteretsuak gizarteari egindako ekarpenarengatik eta horiek ikastea inposatzen digute; edota ikasgeletan erasotzaileak sortzen ez direla bermatzeko mekanismo falta. Argi dago, beraz, egungo hezkuntza sistema erasokorra egiten zaigula, eta ez hori bakarrik, baita hezkuntza sistemak erasotzaileak hezi egiten dituela ere”.
Hezkuntza sistemak erakutsitako hori sistemak ez duela deseraikitzen laguntzen ere jarri dute mahai gainean gaurko mobilizazioaren bukaerako irakurketan, eta gogor salatu dute beldurra baliatzea: “kontatzen digute beldur izan behar garela, kontuz ibiltzeko, ekiditeko pertrsona eta leku ezezagunak, saihesteko desorduak. Badaezpada ere, etxeratze kolektiboak egiteko bueltako bidea. Hartzeko ardura eraso ez diezaguten”. Beldurrak helburu argia du gaurko protestaren deitzaileentzat, “gure bizitzak kontrolatu eta menderatzea. Subjektu pasibo eta beldurti nahi gaituzte. Biolentzia eta autodefentsarako gaitasunik gabe”.
Horren aurrean erresistentzia aldarrikatu dute, “ikasle feministon arteko sareak sortu eta artikulatuz, eta autodefentsa feminista armatzat erabiliz”. Sistemak euren aldarriak “edukiz hustu” nahi duenez, hezkuntza feministaren beharra sozializatzen eta aldarrikatzen jarraitzeko konpromisoa berretsi dute, “ikasle feministak baikara hezkuntza feminista lortzeko agente nagusiak. Errelato patriarkalei salaketa feminista”.
Beldurraren eta menderakuntza saiakerei erantzuteko gakoa ere eman dute: Boteretze kolektiboa, “hezkuntza sistemak beldurrean hezten gaitu, baina guk, autodefentsa feminista”.
