"Urgentziazko mekanismoak behar ditugu, hemen eta orain"
Barakaldoko hilketa matxista gogor salatu du Oreretako Mugimendu Feministak. Indarkeria matxista lehen mailako arazo sozial eta politiko gisa hartzea eskatu du.
Barakaldoko hilketa matxista salatzeko elkarretaratzea egin zuten atzo Clara Rangel plazan. Indarkeria matxista lehentasunezko arazo sozial eta politiko gisa hartzea galdegin du Oreretako Mugimendu Feministak, hori baita, eragile horrentzat bidea bortxa matxistari aurre egiteko emakumeen kontrako erasoak etenik ez duten testuinguru betean. Halaber, urgentziazko mekanismoak eskatu dituzte “hemen eta orain”, ezinbestekoak jo dituzte “errealitate gordin honi aurre egiteko, izan ere, emakumeak emakume izate hutsagatik erailtzen gaituzte”.
Nazkatuta, nekatuta eta haserre atera ziren kalera atzo, berriro: “Urtea gordin hasi dugu. Hilaren 3an arratsaldean gizon bat atxilotu zuten Barakaldon ama hiltzea egotzita. 2025eko lehen hilketa matxista da; 2024a Euskal Herrian sei erailketa matxistarekin bukatu genuen”. Lehenik eta behin Oreretako Mugimendu Feministak “babes eta elkartasun osoa” adierazi zien senide lagun eta gertukoei, “ez zaudete bakarrik”.
Gizartearen egitura patriarkala ageri-agerian jartzen duela indarkeria matxistak nabarmendu zuten Barakaldoko hilketa salatzeko elkarretaratzearen deitzaileek, “kontziente gara erailketa matxistak indarkeria matxistaren eta egitura heteropatriarkalaren ondoriorik latzena direla. Baina bortxakeria matxistak hamaika aurpegi ditu”. Banan bana aipatu zituzten horietako batzuk guzti-guztiak borrokatzea garrantzi bizikoa delako: “Emakumeen diru sarreren gaineko kontrola egitea, kalean begiradarekin jazartzea, eraso bat salatu bakoitzean gure hitza zalantzan jartzea, gizonen arteko aliantzak mantentzea eta eraikitzen jarraitzea eta euren gain hartu beharreko ardurei ez entzunarena egitea indarkeria matxista da. Eta horiekin batera, tamalez, egunero-egunero pairatzen ditugun beste hainbeste egoeren zerrenda amaigabea indarkeria matxista dira”.
Berehalako mekanismoan beharra, urgentziazkoa, berriro mahai gainean jarri zuen Oreretako Mugimendu Feministak eta, bidenabar, salatu egin zuen instituzioen “pasibotasuna” eta jendartearen “konplizitatea”, sinistuta baitago horien ondorioz emakumeen kontrako erasoek ez dutela etenik: “Ez ditugu onartzen egungo jarrera konplizeak eta neurri errealak hartzea exijitzen dugu bizi garen gizarte antolaketa sexista honi aurre egiteko. Gure biziak dira jokoan!”.
Ezin alde batera utzi atzoko elkarretaratzean mugimendu feministarentzat giltzarri den autodefentsa feminista: “Bizitzaren aldeko hautu erradikala egin dugu, eta jakitun gara antolaketa eta autodefentsa feminista ditugula erreminta eraginkorrenak. Horrela bada, autodefentsa feministarako deia egin nahi dugu”.
Antolatzen eta saretzen jarraitzeko konpromiso irmoa atzoko elkarretaratzean ere mugimendu feministak; konpromiso irmoa ere ez isilik gelditzeko, eraso bakoitzari erantzuteko, “lotsa eta beldurra bandoz aldatzen hasi da, eta antolatzen eta saretzen jarraituko dugu, elkarrekin borrokan denak aske izan arte”.
