Deialdia (Trintxerpe): Garbiketa eguna
![](https://oarsoaldea.hitza.eus/site/files/2024/06/captura-de-pantalla-2024-06-05-a-las-14-26-38.png)
Larunbat honetan (hilak 8) Trintxerpe txoko eta bazterrak auzolanean garbitzera deitu dute. Karmengo Ama, Pasaia Lezo Lizeoa eta Anunciata ikastetxeetako 140tik gora haurrek egin dute deialdia, azken hiletan landutako gaien artean ingurumenaren zaintzaz aritu baitira. Teo Alberro alkatearentzat “pozgarria” da “ingurumena hautatu izana eta ingurumenagatik kezka agertu izana”, eledunarentzat “ezinbestekoa baita zaintzaren konpromisoa gazte-gaztetatik barneratzea”.
Eskubideen izenez ezaguna den Pasaiako Haur eta Nerabeen Eskubideak Bermatzeko Planaren barruan kokatu dute larunbateko ekintza. Plan honen helburuetako bat “Pasaiako herrian haurren eta nerabeen partaidetza bultzatzea” da. Adingabeak “subjektu politiko” bihurtu nahi dituzte, “haiek herrirako dituzten proposamen eta iritziak aintzat” hartuta. Oraingo honetan ingurumenarekin lotutako gaiak lantzen aritu dira eta, beraz, “ingurumenaren zaintzaz eta garbitasunaz kontzientzia hartzeko” egitasmoa izango da larunbatekoa.
Trintxerperko Gudarien plazatik abiatuko dira haurrak eta haien gurasoak, 11:00etan. Barrutiko txoko ugari garbitu ondoren, hamaiketakoa izango dela aurreratu du udalak. Antolatzaileek barrutiko familia eta herritarrei garbiketa egunean parte hartzera deitu dituzte.