Azken espetxealdian zazpi urte eta erdi beteta askatuko dute euskal preso lezoarra
Xabier Alegria
Xabier Alegria Lezoko euskal presoa hilaren 21ean askatuko dute zazpi urte eta erdiko espetxealdia beteta. 2007ko azaroaren 30ean, 18/98 auziaren barruan atxilotu zuten azkenekoz Alegria eta zazpi urte eta erdi beteta irtengo da aske. Azken espetxealdian Valdemoro (Madril, Espainia) eta Puerto III espetxeetan izan dute. Azken honetatik irtengo da hain zuzen ere hamahiru egun barru.
Espetxealdi honen aurretik beste hiru izan ditu euskal preso lezoarrak. 1998. urtean espetxeratu zuten lehen aldiz Egin auziaren barruan. Urtebete egin zuen orduan espetxean, Madrilgo Valdemoron. 2000. urtean kartzeleratu zuten berriro Alegria, Ekin auziaren barruan honakoan. Soto del Real (Madril, Espainia) espetxean izan zen orduan 2001eko ekainean askatu zuten arte. Egunkariaren kontrako operazioaren barruan atxilotu zuten ondoren, 2003ko otsailaren 20an. Atxiloketaren ondoren torturak salatu zituen euskal preso lezoarrak. Espetxean zegoela berriz, Udalbiltza auziaren harira inputatu egin zuten, nahiz eta epaiketa eginda absolbitu egin zuten. 2004ko abenduan askatu zuten.
Azken espetxealdiaren ostean, ia zortzi urteren ondoren Lezora itzuliko da berriro ere Alegria.