Xabier Alegria familiarekin
Zortzi eta erdietarako zain zituen Xabier Alegria preso ohiak senideak. Bi ordu beranduago zabaltzen ziren askatasunaren ateak lezoarrarentzat, laugarrenez bere bizitzan. Oraingo honetan data zeukan Alegriak eta horregatik espero baino lasaiago irten dela esan dio LEZOKO HITZA-ri: “Aurretik
hiru aldiz atera naute espetxetik aurretik jakin gabe, eta alde horretatik oso ezberdina izan da gaurkoa, espero nuen aske ateratzea, eta uste baino lasaiago nago, nire burua prestatzeko aukera izan dudalako”.
Abiadurarekin harrituta azaldu da lezoarra, “jendea abiadura handian bizi da eta berehala nabaritu dut tresneria dantzan nola dabilen. Alde izugarria izan da niretzat. Nik orain zortzi urte telefonoz egiten nuen, eta agian espetxetik atera nintzen aurrekoa aldian 100 dei jaso nituen, orain denek mezuak bidaltzen dituzte. Espetxetik denek batera hitz egiten duten giro batetik zatoz, eta orain zazpi gaude eta denak isilik…”.
Kideak agurtzeko aukera
Kideak agurtzeko aukera izan du Alegriak aske atera aurretik, “baita lasai gosaltzeko ere”. Momentu hunkigarrienak horiek izan dira jada preso ohiarentzat, “malkoak ere dantzan hasten dira. Urtebete aldamenean egon den kidea ukitu edo besarkatzeko aukerarik izan ez duzuna, leiho urruti batetik agurtzea…”. Espetxetik atera den bakoitzean izan duen sentsazio berbera errepikatu zaiola ere esan du Alegriak, “oroimena eta oroimina hantxe gelditzen dira, kartzelan… hala esaten dugu beti, eta hala da gertatu bakoitzeko”.
Euskal Herrira heltzeko irrikan dagoela esan beharrik ez du ziurrenik, baina esan du ere. Orain bi urte hil zitzaion ama, gaurko eguna semearekin emateko esperantza bazuen ere… Hori ere gogoan du preso ohiak. Donibanera joango dira zuzenean, 21:30ak aldera, “Itziarren [emaztea] ama ikusteko gogo handia daukat, erietxetik atera berri dago eta gogo handia dut Miren besarkatzeko. Baita babarrunak jatekoa ere, lapikoa bor-borka sentitzeko… Babarrunak ez dakit, baina lapikoren bat izango da etxe hartan”.
Presoen egoera oso gogorra dela esan dio Xabier Alegriak Berriari
