Igoeraren kontra protestatzeko elkarretaratzea deitu dute biharko, sare sozialen bidez; Plenoaren ordu berean da elkarretaratzea, 09:00etan.
Migel Mari Torrea, Ainara Elola eta Mikel Garcia Peñil, gaur, alkateordetzan
Ezohiko plenoa deituta dago biharko Pasaian. Gai zerrendan, besteak beste, gobernu taldeko kideen soldatak igotzeko proposamena. Igoerarako asmoak, baina, herritar askoren haserrea eragin du, sare sozialen bidez elkarretaratze baterako deialdia sustatzeraino. Plenoaren ordu bererako deituta dago soldata igoeraren kontrako elkarretaratzea, 09:00etan, udaletxean.
Pasaiako EH Bilduk gaur eguerdian egin du soldata igoerak salatzeko agerraldia. Esan dutenez, astearteko Ogasun Batzordean jakinarazi zieten asmoa. Orduan aurkeztu zizkieten datuen arabera, alkatearen hasierako asmoa bere soldata %50 igotzea zen, beti ere aurreko alkate Amaia Agirregabiriaren soldatarekin alderatuta. Urteko, 33.897,05 euro kobratzen zituen Agirregabiriak; Izaskun Gomezek 50.997 euro kobratu nahi ditu. Hamalau pagatan banatuta, 3.642,44 euro hileko.
Horrez gain, liberatuen kopurua handitzeko asmoa dutela jakinarazi du EH Bilduk. Gobernu taldea osatuko duten hamar kideetatik zazpi liberatu nahi dituzte, horietatik lau jardunaldi erdian. Hauei ere soldata igo nahi diete. Aurreko gobernu taldean zortzi kide zeuden, eta hiru liberatu, horietatik bat jardunaldi erdiz.
Proposamenak aurrera egingo balu, udal gobernuren soldatentzako gastua %131eko igoko litzateke, EH Bilduk salatu duenez.
Azken orduko aldaketak
Premiazko bilera egin du gaur Izaskun Gomez alkateak EH Bildurekin. Dirudienez, eta ziurrenik gaiak sare sozialetan eragin duen erantzunak hala behartuta, azken orduko aldaketaren bat egongo da biharko plenora eramatekoak diren proposamenean.
EH Bilduk jakinarazi duenez, litekeena da, biharko plenoan alkateak ez zehaztea bere soldata igoeraren zenbatekoa. Koalizio abertzaleak, baina, galdera egingo duela esan du, eta soldata guztiak publiko egitea eskatuko dutela iragarri dute.
Hondakin biltzaileak
Soldata igoeren kontrako elkarretaratzea ez da biharko antolatu duten bakarra. 09:30ean han dute zita beren lanpostuen defentsan borrokan ari diren hondakin biltzaileak.
Hondakinak atez ate biltzeko hamazazpi langile kontratatu zituen udalak aurreko legegintzaldian, eta zerbitzua bertan behera geratzean kaleratuak izatearen beldur dira langileak.
