EH Bildu: "Igoera hau aurrekoa bezain lotsagarria iruditzen zaigu"

Kritiko agertu da koalizio abertzalea udal gobernu taldeak gaur agertu duen jarrerarekin

olatz mitxelena

2015/07/24

Oihane Oronozek hitz egin du EH Bilduren izenean

“Lotsagarritzat” eta “penagarritzat” jo du EH Bilduk udal gobernuak plenoan izan duen jarrera, “ez herritarrei ez oposizioko alderdiei ez dielako inolako azalpenik eman igoerarengatik”. Gobernu programarik ezagutzera eman gabe soldata igotzeko erabakia hartu izana deitoratu dute, eta gaur onartu duten soldata igoera “aurrekoa bezain lotsagarria” iruditzen zaiela gaineratu. “Ez dugu gobernu programarik, egitasmorik, lehentasunik… ezagutzen, dakigun bakarra: alkateak bere soldata % 35 igotzen duela; 10 zinegotzietatik 7 liberatuko dituztela eta gobernu gastua %127 igoko dutela”, salatu dute. EH Bilduk zehaztu duenez, Amaia Agirregabiria alkate ohia baino 12.000 euro gehiago kobratuko ditu urtean Izaskun Gomezek. Koalizioak gaineratu duenez, 17.000 euro gehiago kobratzea zen Gomezen hasierako asmoa, eta sortu den zalapartari egotzi diote atzera egiteko hartu duen erabakia: “Argi dago, sortu den zalapartaren ondorioz ez duela soldata nahi adina igo, baina, zazpi liberatuak mantentzen ditu eurei soldata igoz eta guztira igoerak 101.503,41 euro suposatuko dizkigu pasaitarroi urtero, hau da, % 127ko igoera gobernu taldeko gastuetan”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.