Alkatearen soldata igo eta liberatu kopurua handitzeko erabakiak erreakzio ugari eragin ditu
Aldeko 9 boto eta kontrako 7 botorekin atera da aurrera alkatearen soldata igoera
Lehengo ostiralean alkatearen soldata igo eta liberatu kopurua hirutik zazpira handitzeko hartutako erabakiak erreakzioak eragiten jarraitzen du.
Herritar talde batek, elkarretaratzea deitu du biharko. 19:00etarako luzatu dute deialdia, Trintxerpeko alkateordetzan.
Sare sozialen bitartez zabaldu duten deialdian irakur daitekeenez, “PSE-EEk eta EAJk adostutako neurririk gabeko lapurretaren aurkako elkarretaratzea” izango da biharkoa.
Pasaiak Ahal Du-ren balorazioa
Ostiraleko udalbatzarrean jazotakoak, eta haren aurreko negoziazioetan gertatutakoak baloratu ditu ere Pasaiak Ahal Du-k. Esan dutenez, protestek eragin dute alkatearen atzerapausoa, eta haien ustez horregatik erabaki du azkenik alkateak, soldata %50 igo ordez, igoera %35era mugatzea.
Esan dutenez, Pasaiak Ahal Du filtratu zuen sare sozialetara gobernu taldearen asmoa, lehengo astearen hasieran, eta igoeraren zenbatekoa ezagutzean –lehengo alkateak 33.879,05 euro urteko kobratzen zituen eta soldata 50.997,30 eurora igotzea zen Izaskun Gomezen hasierako asmoa– bizilagunen haserrea pizten joan zela gogoratu dute.
Sortzen ari ziren erreakzioak ikusita, Izaskun Gomezek Pasaia Ahal Du-rekin negoziatzen saiatu zela kontatu dute. Esan dutenez, alkateak beren proposamena egin zezatela eskatu zien eta igoera mugatzearen truke jendearen protestak baretzea eskatu zien.
Jakinarazi dutenez, Pasaiak Ahal Du-k alkatearen eta bere gobernuaren soldatak izoztea eta oposizioaren soldatak murriztea proposatu zuen. Proposamena, baina, ez zen onartua izan.
Gogoratu dutenez, beren eta EH Bilduren kontrako botoekin, azkenik, %35,3ko igoera onartu zuten alkatearentzat, eta %10,4koa bere gobernuko kideentzat.
Bide batez gogorarazi dute plenoetara eta batzordeetara justifikaziorik gabe ez doazen zinegotziei soldata kendu ahal izateko beren emendakina aurrera atera zela.
Irabazi Pasaia
Irabazi Pasaiak, bere aldetik, “lotsagarritzat” jo ditu gobernu taldearen asmoak. Irabaziren arabera, politikariek soldata duina behar dute, baina igoera honi “gehiegizkoa” deritzote, haien iritziz ez delako beharrezkoa eta ezin delako azaldu.
Irabazi Pasaiaren ustez, “sekula oparoa izan ez den udaleko diru kutxaren espoliazioa” suposatuko du igoerak: “Horrek agerian uzten du PSE-EEk eta EAJk beren interesak lehenesten dituztela pasaitarren interesen aurretik”.
