Atez atekoaren ordez, bosgarren edukiontzia, boluntarioa, eta giltzarekin
Gobernu taldeak gaur iragarri du ofizialki Pasaiak hondakinak atez ate biltzeari utziko diola
Gauza jakina zen, baina gaur berretsi dute. Hondakinak atez atez biltzeari utziko dio Pasaiak, eta bilketa zerbitzua berriro ere San Markoko Mankomunitatearen esku utziko du. Datorren astearteko udalbatzarrean bozkatuko dute aldaketa. Hala iragarri berri dute Pasaiako alkate Izaskun Gomezek, eta bere gobernukide Nahikari Oterminek udaletxean eman duten prentsaurrekoan.
Iragarri dutenez, Trintxerpen eta San Pedron hasiko dira zintzilikarioak kentzen eta horiek edukiontziengatik ordezkatzen, urriaren 27an eta 28an. Antxoko barrutia izango da aldaketara batzen hurrena, azaroaren 12 eta 13an, eta astebete beranduago egingo dute aldaketa Donibanen.
Zehaztu dutenez, Donibaneko parte zaharreko Garbitxokoak mantenduko dituzte, edukiontziak bertan sartzeko, eta ez dute baztertzen gauza bera egitea Antxon, nahiz eta oraindik ez duten erabakirik hartu zentzu horretan. Neurri honekin “Pasaian hain eskasa den espazio publikoa aurreztu eta inpaktu bisuala gutxitu” nahi dutela nabarmendu dute.
Herritarrei “izan duten pazientziarengatik eskerrak” eman, eta “aldaketa berme juridiko guztiekin” egin nahi izan dutela azaldu dute.
Birziklatze tasarekin “zorrotzak”
Ezarriko duten sistema boluntarioa izango den arren birziklatze tasarekin “oso zorrotzak” izango direla nabarmendu dute Gomezek eta Oterminek. Ez dute kopururik zehaztu, baina “askotariko legediek ezartzen duten gehienezko kopuruak beraiek gutxienekotzat” ulertzeko konpromisoa adierazi dute.
Era berean, derrigortzea baztertu eta “behar adina sentsibilizazio kanpaina” aurrera ateratzeko asmoa iragarri dute. Lehen kanpaina martxan dutela iragarri dute, eta herriko bizilagun guztiei nola birziklatu behar duten azaltzeko bi-orrikoa postontzietara banatuko dutela esan dute.
Langile batzuk mantendu, gainontzekoak lan poltsara
Hondakinak atez ate biltzen diharduten langileentzat irtenbidea topatu dutela iragarri du agerraldian Gomezek. Zehaztu duenez, hamahiru langiletatik zazpi edo zortzi udalaren zerbitzuetako departamentuan lanean jarraitzeko aukera izango dute, eta gainontzekoak lan poltsan mantenduko dituztela jakinarazi dute.
Horrez gain, FCCrekin hizketan ari direla esan du, udalarekin lanean jarraituko ez duten langileak kontratatzeko aukeraz.
Gomezek esan duenez, asteazkenean jakinarazi zien proposamena langileei, eta hauek ontzat eman dutela adierazi du.
Atez atekoa bertan behera utzi duen lehen udalerria
Honenbestez, Pasaia izango da hondakinak atez ate biltzen hasi eta atzera bueltan edukiontziak ezartzen dituen lehen udalerria.
Aurreko legegintzaldian zabalduko datuen arabera, gaur gaurkoz, Pasaiak %70tik gorako birziklatze tasa du. Aitzitik, gobernu taldeak ez du ontzat ematen datua, “Pasaiatik kanpora eramaten den zabor guztia ez duelako kontuan hartzen”.
