Duintasunak ostiralerako egin du hurrengo hitzordua. Egun horretan Miren Etxezarreta ekonomia doktorea eta Bartzelonako Unibertsitate Autonomoko katedradun emeritoak hitzaldia emango du pentsioen gainean. Duintasunak herritar guztiak deitu ditu hitzaldian parte hartzera Niessen Merkatalgunean 18:00etatik aurrera.
Hamarnaka lagun duintasunaren deialdian
Hileko lehen astelehenero bezala elkarretaratzea eta manifestazioa egin ditu Duintasuna pentsiodun eta erretiratuen elkarteak. Gaur ere, hamarnaka lagunek egin dute deialdiarekin bat, eta pentsio duinik gabe ez dela gizarte justurik salatu dute. Gutxieneko pentsioaren aldeko aldarria egin dute, 1.080 eurokoa, eta hura bermatzeko eskatu diote Eusko Jaurlaritzari eta Eusko Legebiltzarrari: “Gizarte segurantzaren transferentzia exijitzea eskatzen ari gara, eta Euskal Herriko gizarte segurantza bermatu artean, har dezala bere gain gutxieneko pentsio hori kobratzen ez duten lagunen diru sarrera berdintzea”. Horretarako aurrekontuetan diru zatia pentsioetara bideratzeko eskatu dute.
454.064 pentsiodun, 1.000 eurotik behera
Egun Hego Euskal Herrian diren 660.000 pentsiodunetatik, 454.064 1.000 eurotik beherako pentsioa dute. Pentsioak 2011. urtetik 2019. urtera arte izozteak erosteko ahalmena %14,5 galtzea eragingo duela ere salatu du Duintasuna elkarteak. Horri guztiari erreforma berria gaineratu behar zaiola esan dute elkarretaratzean, “seigarrena dagoeneko, eta guztiak bezala langileen eta jende xumearen aurkakoa izango da”.
“Alargunak Gizarte Segurantzaren sistematik atera nahi dituzte erreforma berriarekin, pentsio plan pribatuen alde egin nahi dute, emakumeen eta gazteen lan prekarietatearen kontura eta milaka gazte inmigraziora bidalita aberasten jarraitu nahi dute, eta guri dagokigunez, ez dute nahi zahartzaro duinik izan dezagun”. Horrenbetsez, borroka egingo duela esan du Duintasunak, pentsio duinak lortzeko.
Emakumeaz ere mintzatu da gaurko elkarretaratzean, “bizitza osoan edo zati handi batean lanean latz aritu ostean, familia zaintzen uste dute hori ez dela lana izan, eta horregatik ez dutela pentsio publikorik izateko eskubiderik”. Horren harira, miseriazko pentsioak dituzten emakumeen egoera salatu du pentsiodunen elkarteak, eta Eusko Jaurlaritzari egoera hori zuzentzeko galdegin dio, “egundoko bidagebekeri soziala baita”.
Hitzaldia ostiralean
Elkarretaratzea amaituta manifestazioa abiatu da Herriko plazatik herriko kaleak zeharkatu, eta pentsio duinak eta gizarte justua aldarrikatzeko. Duintasunak ostiralerako egin du hurrengo hitzordua. Egun horretan Miren Etxezarreta ekonomia doktorea eta Bartzelonako Unibertsitate Autonomoko katedradun emeritoak hitzaldia emango du pentsioen gainean. Duintasunak herritar guztiak deitu ditu hitzaldian parte hartzera Niessen Merkatalgunean 18:00etatik aurrera.
Hego Euskal Herriko pentsioak
- 40.240 (%6,4) pentsiodunek jasotzen dituzte 150 eta 350 euro arteko pentsioak.
- 253.443 (%38,4) pentsiodunek jasotzen dituzte 351 eta 600 euro arteko pentsioak.
- 18.480 (%2,8) pentsiodunek jasotzen dituzte 601 eta 650 euro arteko pentsioak.
- 141.901 (%21,5) pentsiodunek jasotzen dituzte 651 eta 1.000 euro arteko pentsioak.
- 106.261 (%16,1) pentsiodunek jasotzen dituzte 1.001 eta 1.500 euro arteko pentsioak.
- 58.080 (%8,8) pentsiodunek jasotzen dituzte 1.501 eta 2.000 euro arteko pentsioak.
- 39.600 (%6) pentsiodunek jasotzen ditzute 2.000 eurotik gorako pentsioak.
[nggallery id=150]
