Herritarren arretarako zerbitzuak zabalduko dituzte Antxon eta Trintxerpen
Atzoko plenoan adostu zuten, aho batez, zerbitzu berria desienatu eta antolatzeko prozesuari argi berdea ematea
Udalak administrazio jardunbideak arrazionalizatzeko eta sinplifikatzeko asmoa du. Udalerriak lau barruti izateak, zaildu egiten du maiz udala eta herritarren arteko hartu emana. Horri egin nahi dio aurre, besteak beste, atzo Udalbatzak adostutako proposamenak. Honenbestez, herritarren arretarako zerbitzua diseinatu eta berrantolatzeari ekingo diote, proposamenak talde guztien babesa lortu zuelako.
Asmoaren xehetasunak ezagutzeke, Trintxerpen eta Antxon herritarren arretarako zerbitzuak martxan jartzeko asmoa dutela aurreratu daiteke. Zerbitzuak martxan jarrita, beste barrutietako herritarrek udalean tramite bat egin behar dute aldiro Donibanera jo behar izatea saihestu nahi da.
Portuko Plan Berezia
Aholku Batzordeak Portuko Plan Berezia azaltzeko bilera abenduaren 2rako deituko duela jakinarazi zuen atzo hirigintza zinegotzi Nahikari Oterminek. 19:30ean izango da, Arizabalon.
Horrez gain, abenduaren 1ean Eusko Jaurlaritzan badiaren egoeraren berri emateko agerraldia izango dela aurreratu zuen alkateak. Izaskun Gomez han izango da, eta berearekin batera Errenteriako alkate Julen Mendoza.
Herrerako pabiloien egoerarengatik kezka
EH Bilduk, bere aldetik, lehengo larunbatean Trintxerpen haizeteak eragindako kalteak ekarri zituen gogora, eta kezka agertu zuen, kaiko Herreran dauden pabiloietako askok ez dituztelako langileen gutxieneko segurtasuna bermatzeko baldintzarik betetzen. UGTk eta LABk bere garaian zentzu horretan egindako salaketa ekarri zuen gogora Oihane Oronozek, eta Portu Agintaritzari kezka agertu diezaion eskatu zion gobernu taldeari, “berandu baino lehen”.
Euskararen Eguna
Abenduaren 3an Euskararen Eguna ospatuko dela eta, adierazpen instituzionala adostu dutela aurreratu zuen Miriam Cano kultur zinegotziak. Euskaldun berriei aitortza egiten die udalaren adierazpenak. Halaber, herritar euskaldunak animatzen ditu instituzio publikoekin dituzten harreman guztietan, ahozkoetan zein idatzizkoetan, euskaraz jardun daitezen.
Horrez gain, herritarrei Euskarak 365 egun lelopean deitutako ekimenetan parte hartzeko deia luzatu diete, eta besteak bete, abenduaren 3tik 10era bitartean balkoietan Euskaraz bizi nahi dut leloa duen banderola jartzeko eskatu diete. Banderolak udal liburutegietan banatuko dituztela iragarri zuten.
Adierazpen instituzionala-2015
