Hasteko, bitxigintza eta ehungintza sektoreetako ekintzaileek tokia izango dute Torrekua eraikinean. Gaur sinatu dute gaiarekin harremana duten alde guztiek hitzarmena.
Torrekua eraikinari edukia emango dioten eragileetako ordezkariak, gaurko agerraldian
Errenteria-Oreretako Torrekuan langintza sortzaileak ardatz izango dituen tailer parte hartzailearen egitasmoa abiatuko dute, Habian! Fabrika Kreaktiboaren egitasmoaren barrukoa. Alde anitzeko egitasmoa da, Errenteriako Udalak bultzatu, Oarsoaldea Garapen Agentziak kudeatu, eta AEK Ikastetxeak nahiz Easo Politeknikoak erabiliko dutelako. Gaur sinatu dute alde guztiek hitzarmena.
Tailerrek, esparru sortzaileko proiektu laboralen hastapena eta finkapena bultzatzeko orientatutako mintegi gisa funtzionatuko dute. Hau da, ikasleak geletatik tailer batera eramango dituzte euren hezkuntza prozesua gara dezaten, baina horrelako egitasmoak sorreran dituzten kostuak arinduz.
Alde guztiak pozik agertu dira gaur, hitzarmena sinatzeko ekitaldian. Oarsoaldea Garapen Agentziaren izenean hitz egin du Julen Mendoza Errenteriako alkateak, egun bertako presidente kargua duelako. Haren arabera “Errenteriako elkarlanerako eta sektore anitzeko Ekintzailetza Poloaren” barruan ulertu behar da proiektua, baina Errenteriaz harago kokatu du Mendozak egitasmoa, Pasaiako badiaren suspertze estrategiaren zati izateraino. Hortaz, esan duenez, egitasmo irekia da, Oarsoaldea mailakoa, baita zabalagoa ere.
Martxo hasieran jarri nahi dute martxan egitasmoa. Hasteko, bitxigintza, ehungintza eta bestelako ofizio batzuetako tailerrak eskainiko dira bertan. Eta elkarlanaren garrantziari erreferentzia egin dio Garapen Agentziaren presidenteak, esanaz, interesgarria eta estrategikoa izateaz gain, inguruko bakarra dela. Oarsoaldearen konpromisoen berri ere eman du, horiek direla tailerraren kudeaketa, dinamizazioa, ekitaldien antolakuntza, aholkularitza, edo herrian erabat instalatzeko laguntza; izan ere, epe jakinerako lagapena izango dute sortzaileek.
Zentroak
AEG eta Easo hezkuntza zentroetako ordezkariek partekatu dute aurkezpen mahaia Julen Mendozarekin batera. Biek ala biek eskertu egin dute elkarlanerako eta adostasunerako jarrera, euren ikasleek hezkuntza prozesuan behar dituzten baliabideetatik garrantzitsuenetakoa lan mundura hurbiltzea dela argudiatuz.
AEGko Amaia Oriaren arabera, euren ikasle eta irakasleentzat aukera handia da beste esparru batzuetara zabaltzeko euren jarduera, “ohiko espazioetatik, ikasgelatik, kanpora”. Ilusioa aipatu du Oriak, “dena ondo atera dadin eskuan dugun guztia egingo dugu”.
Easoko Angel Luis del Riok, bere aldetik, esan du Lanbide Hezkuntza mekanika, elektrizitatea eta gisa horretako ikasketa ezagunetatik harago doala, eremu artistikoan aritzen direnentzako hezkuntza baliabideak dituztelako. Eta kolaborazio borondatea nabarmendu du, aldi berean, Torrekuako egitasmoaren giltzarritzat.
