Garazi Ugalde Pikabeak irabazi du Pasaia Hiria Literatur Lehiaketa, bigarrenez

Anartz Izagirre Zubimendi azpeitiarrak irabazi du bigarren saria

olatz mitxelena

2016/03/15

Garazi Ugalde, Pasaia Hiria, 'Morfologiak'

Garazi Ugalde lezoarrak irabazi du euskarazko lan onenaren saria

Garazi Ugalde Pikabea lezoarrak irabazi du XVII. Pasaia Hiria literatur lehiaketa, bigarrenez, Morfologiak poema-bildumarekin. 2014ean ere sari nagusia irabazi zuen lezoarrak, orduan, Korapiloak lokarrietan lanarekin. Euskarazko bigarren saria Forma geometrikoak zure baitan lanarentzat izan da, Anartz Izagirre Zubimendi azpeitiarrarena. Gaztelaniazko lanen artean onena Anatoema izan da, Álvaro Adrián Perdigón Delgado murtziarrarena. Alejandro Rafael Alagón Ramonek (Huesca) irabazi du gaztelaniazko atalean bigarren saria Los horizontes necios poema bildumarekin. Epaimahaia Nerea Beldarrain eta Irati Goikoetxea idazleak euskarako epaimahaiko lanetan aritu dira, eta Elena Roman, Jesus Maria Corman eta Felix Maraña izan dira gaztelaniazko epaimahaiko kideak. Gaztelaniaz 61 poesia-bilduma aurkeztu dira, eta euskaraz zazpi. Saritutako poema-bildumak liburu banatan argitaratuko ditu Berminghamek. Liburuak etzi aurkeztuko dituzte, (hilak 17), 19:00etan, Trintxerpeko liburutegian, sariak banatzearekin bat. Izen handiko lehiaketa Pasaiako sariak 1980. urtean sortu ziren, Pasai Antxoko Altamira Puente liburuzainak bultzatuta. Udalak hasiera-hasieratik hartu zuen sarien sustapena bere gain. Altamira Puenteren laguntzaileen artean berehala nabarmendu zen Pasaiako zinegotzi eta alkate izandako Xabier Portugal. Berak eman zion jarraipena ekimen honi. Horregatik, gaur egun, bien izena darama lehiaketak: Pasaia Hiria -Xabier Portugal- euskaraz, eta Villa de Pasaia -Altamira Puente gaztelaniaz. Pasaiako literatur lehiaketa gaur egungo poesiaren bozgorailuetako bat da. Sorreraz geroztik berrogeita hamarretik gora idazlek jaso dituzte sariak, bai euskaraz, bai gaztelaniaz, eta haien lanak hedatu eta zabaldu egin dira arretaz zaindutako edizioetan. Gaur arte 26 liburu argitaratu dira, 15 gaztelaniaz eta 13 euskaraz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.