Martxa antolatu du Sortuk larunbatean Fresnesko espetxeara bertan diren euskal presoei elkartasuna erakutsi eta isolamendua amaitzeko eskatzeko.
Hamarka lagunek eskatu zuten atzo isolamenduarekin amaitzeko.
Martxa antolatu du Sortuk larunbatean Fresnesko (Paris) espetxera. Xabier Goienetxea preso oreretarrak eta berekin gizonen moduluan dauden beste euskal presoek
hamasei egun bete dituzte gose greban gaur. Goinetxearekin batera Ugaitz Errazkin, Saul Curto, Oier Ibarguren eta Enrique Lopezek bete dituzte 16 egun jan gabe. Espetxe berean diren Ekhiñe Eizagirre eta Itziar Morenok, berriz, hiru egun beteko dituzte gaur gose greban, eta Iratxe Sorzabal irundarrak uko egiten die espetxeko hainbat otorduri. Atzo Hernanin egindako agerraldian eman zuten martxaren berri, eta Errenteria-Oreretatik,
Irundik, Hego Euskal Herriko lau hiriburuetatik eta beste hainbat herritatik autobusak irtengo dira ostiral iluntzean Fresnes bidean bertan diren euskal presoei sostengua erakustera. Errenteria-Oreretako autobusa Panierretik irtengo da 21:15ean, eta izena berriz, Landare tabernan eman behar dute interesdunek.
Espetxe politika mendeku klabeetan kokatu du Sortuk, eta bakartzea eta euskal presoei ezartzen dizkieten salbuespen neurriak “presoen eta beren senideen sufrimendua areagotzea eta gatazka politikoaren konponketa eragoztea” dutela helburu gaineratu zuen. Horren harira indarrak batu eta presio sozial eta politikoa areagotzea proposatu du alderdi politikoak, “mobilizazioak indartzea beharrezkoa da, espetxe politika anker hau amaitu eta euskal preso politiko guztiak etxera ekartzeko”.
Elkarretaratzea atzo Errenteria-Oreretan
Xabier Goienetxeari hamarnaka lagunek helarazi zioten
elkartasuna atzo berriz ere. Elkarretaratzea egin zuten Niessen merkatalgunearen sarreran
Isolamendurik ez! lemapean. Elkarretaratzean bertan emandako informazioaren arabera “ahultasuna” sumatzen hasi dira Fresnesen diren euskal presoak hamasei eguneko gose grebaren ondorioz, baina indartsu daudela gaineratu zuten.
Hilaren 2an isolamendura eraman zuten Itziar Moreno Fresnesko espetxean den euskal presoa, eta baita konfinatu ere. Neurri horrekin amaitzeko eskatzeko hasi zuten protesta espetxe berean diren beste euskal presoek, eta hasieran esan zuten moduan Moreno isolamendutik atera arte gose grebarekin jarraituko dute.
