Asteazkenean abiatuko dira Burgostik Albaolarantz datozen hiru gurdiak
Hilaren 17an iritsiko dira gurdiak San Pedrora.
Gurdi Bidearen aurkezpena, Albaolan.
Hilak 31n, asteazkena, idi eta behi menditarrez osatutako hiru gurdirekin abiatuko dira Burgostik Itsas Kultur Faktoriara bidean Albaola eta Quintanar de la Sierra herriko Cabaña Real de Carreteros elkarteetako kideak.
Hemezortzi egunez Burgos, Araba, Nafarroa eta Gipuzkoako hainbat herritatik igaroko dira, gurdietan, San Juan baleontziaren erreplikaren eraikuntzan baliatuko duten bikea eta alkitrana ekartzeko. Aitzin eran ekoizten dituzte Burgosen bi lehengaiak, eta horregatik ekarriko dituzte handik.
Gurdi Bideetatik barrena Gurdi Bideak izena du etzi abiatuko den egitasmoak. Iniziatibaren bitartez mendeetan zehar euskal itsasertzera garraiatzen ziren lehengaien garrantzia ekonomikoa nabarmendu nahi du Albaolak. Era berean, luzaroan herri eta kulturen artean izan diren harremanak berreskuratu nahi dituzte.
Bestalde, gaur egun desagertzear dauden bi espezieen gaineko arreta piztu nahi dute. Iraganean garraiorako baliatzen zituzten idi eta behi menditarrek tiratuta ekarriko dituzte Burgostik heldu diren gurdiak, eta zeharkaldian zehar haien defentsa aldarrikatuko dute.
Hemezortzi etapa Albaolak Donostia 2016aren barruan bultzatutako iniziatiba hau irekia da, eta nahi duen edonor batu daiteke zeharkaldira.
Zeharkaldiak irauten duen bitartean eta antolatutako etapa guztiak girotzeko, egitarau zabala atondu dute, askotan, zeharkatuko dituzte herrietan bertan antolatuak. Izan ere, aurrez aipatutako guztiez gain, sustapen turistikorako baliagarria izan nahi du iniziatibak, eta bide batez, natur baliabideen zaintza lagundu eta sustatu nahi du.
