[Bideoa] Protesta artean egin dute Pasaian urtarrileko udalbatzarra
Trintxerpeko sutean etxea galdu zuten bizilagunak lizentzia eske joan ziren plenora eta Kaipeko langileek beren lan gatazkaren berri eman zuten.
Ez da ohikoa, baina atzoko udalbatzarrean gai zerrendatik kanpoko gaiek hartu zuten protagonismoa. Urtezaharreko sutean etxea galdu zuten Trintxerpeko bizilagunek pleno aretoa bete zuten. Konponbide eske egon ziren batzar aretoan, aldarriak eskuan, Udalbatzari parez pare begira. Udalbatzak ez zuen beren auzia jorratu, eta aipamenik ere ez zuen inork egin. Bizilagunak, plenoa bukatu artean egon ziren han, batzarra bukatuta, lizentzia eske aldarrika hasi ziren arte.
Gai zerrendatik kanpo ere zaharren etxeko langileen auzia. Kaipeko langileen ordezkariak plenoan izan ziren, beren lan gatazkaren berri ematen. Mozioa aurkeztu zuten langileek, udalari Kaiperekin kontratua ez berritzeko eskatuz, baina “prozedura akats bat tarteko” gaia ez zegoen atzo eztabaidatu zituztenen artean. Hala ere, alkateak hitza eman zion langileen ordezkari Amaia Gastesiri, eta honek azaldu zuen auzia. Gizarte gaietako zinegotzi Sergio Ekizak eman zituen azalpenak ondoren, eta udala, langile eta enpresaren arteko bitartekaritza lanak egiten diharduela jakinarazi zuen, akordioa lortze aldera.
Kirol Departamentua martxan da
Gai zerrendan ageri eta adostu zituztenen artean nabarmentzekoa – gai denak aho betez onartu zituzten atzo- Jarduera Fisikoaren eta Kirolaren Aholku Kontseiluaren sorrera.
Orain gutxi arte gazteria eta kirola batera kudeatzen ziren Pasaiako Udalean. Aurreko legealdian hasi zuten aldaketa, kirolarentzako departamentu berezitu bat sortu asmoz. EH Bilduk sustatuta egin zen aldaketa, eta legealdi honetan PSE-EEk eta EAJk aldaketari jarraipena ematea erabaki dute. Herriko eragileekin landu dute aldaketa, eta sorrera atzo adostu zuten behin betiko talde denek, aho batez.
Lide Castellanoren agurra
Plenoko beste protagonista atzora arte Pasaiak Ahal Du-ren zinegotzi Lide Castellano izan zen. Dimisioa eman zuen zinegotzi gazteak, agurra irakurrita, hunkituta, eta eskerrak emanez bere hautagaitza babestu zutenei. Alkateak herriaren alde egin duen lana eskertu zion Castellanori eta txalo artean agurtu zuten udaleko zinegotzi denek.
Castellanorena legealdi honetako hirugarren dimisioa izan da Pasaian. EAJko Erik Rios izan zen dimisio ematen lehena, eta gerora etorri zen PSE-EEko independente Enrique Sanchezen dimisioa. Ondoren Manuela Nicolasek PSE-EE utzi eta atxiki gabeko zinegotzi gisa ari da orduz geroztik.
Castellanoren postua Florencio Moro antxotarrak hartuko du otsaileko plenoan. Moro plenoan izan zen atzo, publiko artean.
Zinegotzi guztien babesa jaso zuen Castellanok bere agurrean.
Erlazionatutako edukiaSan Pedroko zaharren egoitzako langileak borrokan
