"Lortuko dugu. Aitzol etxera!"

Aitzol Gogorzaren askatasuna eskatzeko agerraldia egin du Sarek gaur. Haren kontrako "mendekua" salatu dute, eta 100.2 artikulua aplika diezaiotela.

Urko Etxebeste Petrirena

Errenteria-Orereta

2017/02/25

Hamarnaka herritarrek bat egin dute Sareren agerraldiarekin.

Aitzol Gogorza larri gaixo dagoen euskal preso oreretarraren egoera salatzeko, eta hari elkartasuna adierazteko agerraldi jendetsua egin dute gaur goizean Errenteria-Oreretako Herriko Plazan. Orereta Errenteriako Sarek Gogorzaren egoeraz irakurketa egiteko deitu duen agerraldira hamarnaka herritar batu dira, “lortuko dugu. Aitzol etxera!” esan dute. Plazan bertan Gogorzaren lagunek postua jarri dute, hainbat gairekin. Denek, presoari, haren senideei, eta larri gaixo dauden presoei “besarkadarik beroena” eman diete. Eta aurrerantzean Sarek antolatuko dituen mobilizazioetan parte hartzera deitu dute jendartea. Hizlarien mahaian Arantxa Otaegi Aitzol Gogorzaren ama, Maitane Aizkorreta eta Arrate Manzisidor Sareko kideak, eta Orereta Ikastolako langile Maite Intziarte egon dira; Orereta Ikastolako ikasle izandakoa da Gogorza. Presoari 100.2 artikulua —larri gaixo dauden presoei espetxealdi arindua edo kondena espetxetik kanpo egitea jasota du lege horrek— aplika diezaiotela eskatu dute, eta hark espetxean zergatik jarraitzen duen galderari erantzuna eman diote: “Mendekua. Estatuak iraganeko sufrimenduari lotuta eduki nahi gaitu. Baina guk, sufrimenduaren atea itxi eta etorkizunaren leihoa ireki nahi dugu”. Bateratzeko deia egin du Sarek, “ideologiak alde batera utzita”. Gogorzaren eta larri gaixo dauden presoen eskubideak errespeta daitezela bete dadin “indar guztiak” metatzearen beharra adierazi dute, baita gizartearen aktibazioa ere, “horretarako denak, bai denak, beharrezkoak gara”. Eta aipatu dute Gogorza eta larri gaixo dauden presoen askatasuna eskatzeko euskal gizartearen gehiengo sozial, politiko eta sindikalak bat egin duela. Gaur, horren erakusle izan da Herriko Plazan bildu den jendetza. 19 urtez espetxean 19 urte daramatza espetxean Aitzol Gogorzak. Egun, Basauriko (Bizkaia) espetxean dago. Bere eritasunagatik azken urteetan 27tan igresatu dute ospitalean, horietako bitan tronbolismo bategatik. Joan den asteko ostegunean gose greba hasi zuen presoak bere egoeragatik protesta egiteko, eta astelehenean amaitu. Abuztuan ere egin zuen borrokaldi hori.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.