Manifestazio isila deitu dute biharko, 'Gure seme-alaben etorkizunaren alde'

Agerraldia egin dute gaur joan den larunbatean Iruñean atxilotutako lau oreretar gazteen gurasoek.

2017/03/17

Iruñean atxilotutako lau gazteen gurasoen agerraldia.

Agerraldia egin dute gaur joan den larunbatean Iruñean atxilotutako lau oreretar gazteen gurasoek. Horietatik hiru espetxeratzea agindu zuen epaileak astelehenean, eta laugarrena atxilotu eta ordu batzuetara aske utzi zuten adin txikikoa zelako. Laurei egotzi die epaileak desordena publikoak eta terrorismoa, eta horrenbestez, Espainiako Auzitegi Nazionalera bidali du auzia. Ruben, Endika eta Asierren gurasoak hamarnaka herritarrek babestuta azaldu dira Mikelazulon egin duten agerraldian. Biharko, Errenteria-Oreretan Gure seme-alaben etorkizunaren alde lelopean deitu duten manifestazio isilaren berri eman dute. Manifestazioa 17:30ean abiatuko da Herriko plazatik. Manifestua irakurri dute. Patxi Petrirenak euskaraz, eta Marisa Mujikak gazteleraz. Iruñean joan den larunbatean izandako “indarkeria ekintzak” gaitzetsi dituzte, eta beren semeek bertan egin zen manifestaziorako baimenik ez zela eskatu ez zekitela erantsi dute, “ezta biolentoa izango zenik ere”. Ikasi eta lan egiteaz gain, hiru gazteek aktibismoa sozialarekin “konpromiso irmoa” dutela esan dute: ” elikagaien banku solidarioa antolatzen dute, musika kontzertuak, hitzaldiak eta kultur proiektuak”. Eskaera zehatzak egin dituzte manifestuan gazteen gurasoek. Auzia epaitegi arruntera itzultzeko eskatu dute gurasoek, eta gazteak behin behinean aske uztea, “indarkeria ekintzak, eta ekintza terrorista gisa kalifikatuta egin nahi duten gertaeren estrapolazioak ez dutelako ezertan laguntzen guk eta gure semeek desio dugun elkarbizitza baketsurako prozesua”. Horren harira, erakunde, herria, familia eta lagunei oro har laguntzea eskatu diete, “gure semeak etxera ekartzeko desio zilegia” egi bihurtzeko, “gaur bihar baino hobeto”, eta bide horretan sortutako indarra “errebindikazioen borondate baketsu zorrotzak” gidatu dezala eskatu dute. Ildo horretan sakondu dute, eta inoren “bortxazko injerentziarik edo manipulaziorik” ez dutela onartuko esan dute argi. Manifestu hori beraien, zein beren semeen desioa dela gaineratu dute, amaitzeko, “Iruñeako espetxetik hala berretsi dute hirurek”. Bildutako hamarnaka eta hamarnaka lagunen txalo artean amaitu dute Ruben, Endika eta Asierren gurasoek agerraldia.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.