Ametsen Bidea maiatzaren 27an egingo dute, Kalu Ericek 120 kilometroko erronka egiten duen bitartean, ekitaldi asko egingo dituzte Lezon.
Ametsen Bidearen bultzatzaileak, egitasmoa aurkezten.
Elkartasuna eta kirola elkartzen dituen egitasmoa da
Ametsen Bidea. Baina ez hori bakarrik. Maiatzaren 27rako antolatu duten egunaren harira kultur egitarau oparoa antolatu dute Markelen Irria eta Juneren Hegoak taldeek, Lezoko Udalaren laguntzarekin. Arkaitz Kalu Ericek 120 kilometroko erronka beteko du Mutrikutik Hondarribira (eta handik Lezora buelta), mendi bideetatik. Helburua: Markelen Irria eta Juneren Hegoak elkarteek haur gaixoekin eta haien senideekin daramatzaten egitasmoak finantzatzeko dirua bildu nahi du, zehazki, Donostiako Ospitaleko haurren atalari izaera humanoagoa emateko.
Antolatzaileez gain, hamarnaka laguntzaile ditu egunak. Denei eskerrak eman dizkiete antolatzaileek. Izan ere, eguneko egitaraua, maiatzaren 27ko Kaluren erronka bezala, handia da. Honakoa da egun horretarako bide orria. Ekitaldi guztiak Karlos Saldise plazan egingo dituzte.
- 15:30ean, Kalu Ericeri harrera egingo diote, Pasaiako badian, San Pedro, Hibaika, San Juan, Illunbe eta Kaiarribako traineruek.
- 16:00etan, txupinazoa eta haur korrika.
- 16:00-18:00, puzgarriak, ponyak eta askaria.
- 18:00-18:30, erraldoiak eta buruhandiak.
- 18:30-20:00, hainbat emanaldi: magia ikuskizunak (Gipuzkoako Magoen Elkarteko kideenak), eta Algaraklown pailazoenak.
- 20:00etan, Ongi Etorri Ametsen Bidea, Kalu Ericeri ongietorria Lezon.
- 20:00etatik aurrera, elkartasun Phototxelfiea.
- 20:30-21:45, herri parrillada.
- 22:00etan, Maider Zabalegiren eta Oscar Portuguesen kontzertuak.
