Goiko plazan dagoen kioskoa eraisteko agindu duela alkateak salatu dute hura auzolanean konpontzen ari diren hainbat gaztek.
Kioskoa auzolanean berritzen ari dira hainbat gazte. Jakin dutenez, udalak eraisteko agindua eman du.
Urteak daramatza Goiko Plazan. Garai batean litxarreriak saltzen zituzten bertan, eta urte luzez aritu da horretan. Azken urteetan, berriz, itxita izan da Lezoko Goiko plazako kioskoa. Duela bi urte kioskoaren giltza lortu zuten Lezoko hainbat gaztek eta herriak erabiltzeko izan behar zuela erabaki zuten. Pixkanaka hasi ziren konpontzen barrutik, “txikituta zegoelako”, eta Etxandi Oroitaldian zabaldu zuten lehenengoz: “Helburua bertan bildutako jendeari zerbitzu bat ematea zen, pipak eta halakoak erosteko aukera eskaintzea”. Bildutako dirua kioskoa konpontzen jarraitzeko baliatu dute, “zerotik hasi ginelako”, azaldu dute.
Teilatua konpontzen hasi dira orain, “usteltzen hasia zen eta bildutako diru apurrarekin konpontzea erabaki genuen”. Atzo bertan, ordea, berria heldu zitzaien. Alkateak kioskoa botatzeko agindua emana du. Udala ez dela gazteekin ezertarako bildu, eta ez diela inongo jakinarazpenik egin esan dute, “modu ez ofizialean jakin dugu kioskoa botatzeko asmoa duela udalak”. Kexu azaldu dira gazteak, “ikusi dutenean gazteak mugitzen hasi garela honekin zerbait egiteko, kioskoa berritzeko, zerbait serioagoa egiten, alkateak ahalik eta azkarren eraisteko agindua eman du”.
Atzo arratsaldean batzarra egin zuten hamabost gazteek, eta baita erabakiak hartu ere, berreskuratzen ari diren kioskoa babesteko. Goizeko zortzietan Goiko plazan bildu dira, eta
Kioskoa herriarentzat Gezurrik ez! goiburua zuen pankarta egin eta zintzilikatu dute, udaletxe ondoan. Beldur ziren gaur bertan azalduko ote ziren eraikina eraistera. Alkatearekin hitzordua eskatuko dute orain, “informazioa eskatzeko, jakiteko zergatik erabaki duten botatzea kioskoa, eta ahal badugu negoziatzeko. Guk ez dakigu ezer, ez zergatik bota nahi duten ez beste ezer. Esan diete gaizki dagoela, baina gu prest gaude auzolanean konpontzeko, horretan ari ginen jada”.
Eguerdian zein arratsaldean plazara udaltzainak hurbildu direla jakinarazi dute, gainera, gazteek: “Kioskoan ezin dela inor egon eta itxita egon behar duela esan digute. Zergatia galdetu diegunean, ezin digutela ezer gehiago esan erantzun digute, udalaren agindua dela”. Halere, plazan jarraitzen dute gazteek, eta batzarra deitu dute 20:30erako Goiko plazan, “gaiaz hitz egin eta erabakiak hartzeko”.
