Aita Manuel ezinbesteko pertsona da San Pedroko arrauna ulertzeko. Haren patroi bezalako lehen Kontxaren mendeurrenean, omenaldia egingo diote.
Batzordeko kideak, 1917ko Kontxa irabazi zuen taldearen aurrean.
1917ko irailaren 16an lortu zuen Manuel Arrillagak, Aita Manuelek, patroi bezala San Pedrorekin lehen Kontxako Bandera —aurretik San Pedrok bazituen Kontxak irabazita, hiru zehazki: 1880an, 1899an eta 1906an—. 100 urte geroago, sanpedrotarrek orduko giro hori nola bizi izan zen irudikatu nahi dute. Horretarako, egun osoko egitaraua, sorpresaz beterikoa, prestatu dute larunbaterako. III. Aita Manuel Eguna egingo dute.
Egitaraua xumetzat jo dute antolakuntza lanetan ibili diren batzordeko herritarrek. Xumea, baina hunkigarria oso izango da. Eta horren barruan, Manuel Arrillagaren senideek parte hartuko dutela aurreratu dute. Besteak beste, 1917ko Kontxa hura nola ospatu zuten irudikatuko dute antzezpen bidez, eta nola ez, alkateordetzan, merezitako omenaldia jasoko dute irabazleek.
Ohar bat: antolatzaileek herritarrei eskatu diete arrantzalez jantzita joateko. Aldi berean, balkoietan oihal eta bandera moreak jartzeko eskatu diete.
Honakoa da egitaraua:
- 09:ooetan, diana.
- 10:00etan, oroitzapen meza berezia.
- 11:30ean, danborrada Udal Aretotik Torreatzera.
- 12:00etan, antzezpena Torreatzen.
- 13:00etan, arraunlariei ongi etorria Herriko Plazan.
- 13:30ean, arraunlariak alkateordetzako balkoian izango dira. Bertsoak izango dira.
- 14:00etan, aurreskua.
- 14:30ean, familien bazkaria eta herri bazkaria Arraunlari kalean.
- 17:00etan, Kanta Kantari jarduera.
- 18:00etan, txaranga.
- 19:30ean, Imanol Carballo eta Konpainiaren kontzertua Antxeta, Pelos eta Begihaundi tabernek antolatua.
- 21:00etan, jaiaren amaiera.
