Hilaren 25ean, astelehena, komunikazio kanpaina berri bat hasiko du udalak, gaikako bilketa egiteko ezarriko den sistema berria ezagutarazteko.
Rodriguez, Legorburu, Lemos eta Franco gaurko agerraldian.
Kontsentsua lortu dute. Hondakinen bilketak tentsioak eta gatazkak sortzen baditu ere, Errenteria-Oreretan lortu dute udalean ordezkaritza politikoa duten alderdi guztiek akordiora heltzea. Horrela aurkeztu dute epe laburrean udalak abiatuko duen gaikako bilketa sistema berria, alderdi guztien kontsentsuarekin.
Errenteria Irabazizeko kide, eta Ingurumen Zinegotzi Jose Cruz Legorburuk aurkeztu du kontsentsua, EH Bilduko Bernar Lemos, PSE-EEko Jose Angel Sanchez eta EAJko Manu Francorekin batera. Gaikako bilketa sistema berria albiste bada, horren inguruan akordioa lortzeko EH Bilduk, Errenteria Irabazizek, PSE-EEk eta EAJk izan duten “gaitasunak”, garrantzia handiagoa hartu du.
Agintaldiaren hasieratik kontsentsua bilatu eta hondakinen bilketaren gaineko gatazka gainditzeko lanean aritu dela EAJ esan du Francok, “lan hori zein alderdien eta gobernu taldearen jarrerak erraztu du akordioa”. Herritarrak “aktiboki” inplikatzera deitu ditu hondakinen gaikako bilketa kanpainan, “ingurumenarentzat garrantzitsua delako eta erakunde gisa halakoak egitea dagokigulako”.
Ildo beretik mintzatu da Rodriguez, eta kanpaina eta birziklatze tasaren arrakasta herritarren parte hartze eta inplikazioaren araberakoa izango dela esan du: “Arduraz eta seriotasunarekin inplikatzera deitu nahi ditugu herritarrak. lan egin dugu akordio hau lortzeko, eta lan egiten jarraituko dugu arrakastatsua izan dadin eta ahalik eta gehien birziklatzeko”.
Akordioaren oinarria ordenantza dela esan du Lemosek eta balorean jarri du alderdiek erakutsi duten malgutasuna akordiora heltzeko, “bat egin dugu helburu zehatz batekin. Birziklatu egin behar da eta hori da garrantzitsuena. Horretarako kanpaina indartsua bultzatuko dugu, eta herritar guztiak animatu nahi ditugu birziklatzera, merezi duelako”.
Birziklatze tasan jauzia
Hilaren 25ean, astelehena, komunikazio kanpaina berri bat hasiko du udalak, gaikako bilketa egiteko ezarriko den sistema berria ezagutarazteko. Lehenengo eskutik, etxez etxe egingo du kanpaina hori bosgarren edukiontziaren sisteman parte hartu ez duten herritar guztiak bisitatzeko. 12.000 etxebizitza dira guztira. Bisita egingo duten pertsonek, identifikazio txartela eramango dute.
Horretarako, lehenik eta behin oharra jarriko du bisitatuko dituen etxeen atarietan. Udalak sei asteetan zehar, orain arte bosgarren edukiontziaren sisteman parte hartu ez duten herritar guztiak bisitatuko ditu. Eñaut Gracia Herritarren Parte Hartze eta Komunikazio zinegotziak azaldu duenez, herritarren kezkak argitu, indikazioak eman, eta kuboa, poltsak eta birziklatzeko gida emango dizkiete bizilagunei.
Sistema berriarekin, errefusa jasotzeko erabiltzen diren edukiontziak itxita egongo diren grisengatik aldatuko dira. Horrenbestez, edukiontzi marroia zein grisa txartel berri bakarrarekin zabalduko dira. Txartelak, behin bisita guztiak amaituta bidaliko ditu udalak etxe guztietara, 17.000 denera. Urriaren hasieran izango da hori. Bien bitartean edukiontzi grisa eta marroia zabalik izango dira, txartela berria heldu arte. Bi edukiontziak 24 orduz zabaltzeko aukera izango da, astelehenetik igandera.
Informaziorako etxola izango da Herriko plazan, bestalde, 26tik aurrera, herritarren zalantzak eta kezkak erantzun ahal izateko.
hartutako neurri horiekin guztiekin errenteriar ekoaktiboen kopurua ugaritzea espero dutela esan du Graciak, “orain 8.000 ekoaktibo bagara, espero dugu kopuru hori handitzea. Udalari diru gehien kostatzen zaiona errefuxa zabortegietara bidaltzea da. Ongi eginda, aurreztutako dirua politika publikoetan inbertituko da”. Hobariak mantendu egingo ditu udalak.
Kanpaina zein alderdi politiko guztien artean lortutako kontsentsuaren helburua hondakinen sailkatze eta birziklatze tasan gora egin eta Errenteria-Orereta herri osasuntsuagoa bilakatzea da.
