Babes osoa adierazi die Pasaiako EH Bilduk Rokandio eta Agirregabiriari

Bi urte eta sei hilabeteko espetxe zigorra ezarri die epaile batek

Hegoi Belategi

2017/10/03

EH Bilduko zinegotzi eta alkate ohiek babesa adierazi diete bi auziperatuei

Pasaiako udaletxean agerraldia egin zuten atzo EH Bilduko zinegotzi eta alkate ohiek, Amaia Agirregabiria eta Iker Rokandiori “elkartasun, maitasun eta babes osoa” adierazteko. Gehiegikeria iruditzen zaie epaileak bien kontra hartutako neurria, argi baitute “Amaiak eta Ikerrek zuzen jokatu zutela eta herritarren alde egin zutela, akats teknikoak aurkitu badaitezke ere”. Bi urte eta sei hilabeteko espetxe zigorra ezarri diete alkate eta udal langile ohiari, udaltzain batek jarritako salaketaren harira. 2013an izandako udaltzain eta herritar baten arteko liskarrak eragin du egoera. Hilabeteak aurrera egin ahala, tentsioak gora egin eta auziak bide penaletik jo zuen. Aukera hura bi aldeentzako kaltegarria zelakoan, alkateak herritarrarentzat zein udalarentzat onuragarria izan zitekeen irtenbidea topatzea agindu zuen. Gauzak horrela, udaltzainek epaitegian ez aurkezteko konpromisoa hartu zuten eta herritarrak salaketa atzera botatzeko. Udaltzainek ordea, adostutako dekretuari jaramonik egin ez eta udal idazkaria, letratua eta alkatea salatu zituzten epaitegian. Fiskalak bere egin zuen akusazioa eta honako delitu hauek egotzi dizkie Rokandio eta Agirregabiriari: prebarikazioa, justiziari traba egitea eta koakzioa. Udal idazkaria absolbitu zuten. Martxoan lehen epaia jakitera eman zen, urte bat baino gehiagoko espetxe zigorra, zazpi urteko gaitasungabetzea eta isun ekonomikoa ezarri zien epaileak. Udaltzainetako batek, epaia errekurritu zuen eta bigarren erabakiak bi urte eta sei hilabeteko espetxe zigorra ezarri die. Espetxera joan beharko dute beraz, azken epaiak ez baitu errekurtsorik onartzen. Pasaiako EH Bilduko kideek, auzi honek eragindako egoera bidegabea gaitzetsi dute. Babesa eskainiko diete biei, argi dutelako herriaren interesen alde egin zutela. “Nabarmendu nahi dugu alkateak eta letraduak ondo jokatu zutela, proportzionaltasun printzipioa oinarri hartuta, konponbide arduratsu bat bilatzeko” adierazi zuten EH Bilduko ordezkariek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.