[Galeria] Aritz Leonet eta Lurdes Oiartzabal, Urkabeko gurutzeko zintzarria jotzen lehenak
Urkabeko Igoeraren bigarren ekitaldia egin dute gaur arratsaldean. Helmugara iristen lehenak, Aritz Leonet oiartzuarra eta Lurdes Oiartzabal lezoarra.
Partaide guztiak, proba bukatuta, Urkabeko gurutzean. 
Elikaesport-ek babestutako albistea
Euskal Herriko herri lasterketen panoraman, ziurrenik, probarik motzena da Urkabeko igoera. Baina zer nolakoa! 1,6 kilometro, ia etenik gabe maldan gora, Gaetxeko skate parke ingurutik, Urkaberaino (bidean Tronpeoko, Legarreko, eta Urkabera igotzeko aldapa oso esanguratsuak). Bada gaur arratsaldean egin dute Urkabeko II. Igoera, eta horretan irabazle Aritz Leonet oiartzuarra (8 minutu eta 58 segundoko denborarekin), eta Lurdes Oiartzabal lezoarra (11 minutu 37 segundo) izan dira. Bat etxekoa, beste ondokoa.
Intxixu Trail Girizia taldeko kideek antolatutako proban 35 lagunek eman dute izena orotara. Horietatik dezente, Kataluniatik etorritakoak; izerditan iritsi dira denak Urkabeko zintzarria jotzera, bide latzaz gain, beroak ez duelako gehiegi lagundu. Hala ere, helmugan, freskagarriak eta zer jan bazuten parte hartzaileek, ez zaie deus ere falta izan. Ondo indarberritu dira denak.
Lehen emakume eta gizonaz gain, lehen oiartzuarrek ere saria jaso dute. Gizonetan, sailkapen nagusiko irabazlea oiartzuarra izanda, kalkulu erraza: Aritz Leonet izan da lehena sailkapen nagusian, beraz, oiartzuarren buru ere. Eta erne lehen emakume oiartzuarrarekin: Irati Gaztelumendi izan da irabazlea herriko emakumeen kategorian, gazte-gaztea bera, eta etorkizun handiko kirolaria zinez.
Proba 17:30ean hasi da, eta denak helmugara 2o minutu inguruan iritsi dira. Sari banaketa 19:00etan egitekoa zen, Done Eztebe plazan, Garagardo Festa baliatuz. Sailkapen oso-osoa datozen orduetan jarriko dute Herrikrosa plataformaren webgunean.
Jarraian, helmugako hainbat argazki.
