Mozio bidez eskatuko dute Donibaneko saneamendua

Eguzki Talde Ekologistak eta barrutiko hainbat eragilek lanak berehala hastea eta finantzazioa bermatzea exijituko dute.

olatz mitxelena

Pasaia

2017/10/25

Eguzkik ur zikinen proiektua aurrera atertzea eskatzen du aspalditik.

Pasai Donibanek oraindik ez du saneamendu sarerik, eta Eguzki Talde Ekologistak eta barrutiko beste hainbat eragilek mozio bidez eskatuko dute gaiari lehenbailehen hel diezaioten. Hilaren 20n erregistratu dute udalean mozioa. Salatu dutenez, mozioaren bidez eskatuko diote udalari “esplizituki eskatzeko saneamenduko lanen finantzazioaren arduradunak diren erakundeei, lanak 2018an has ditzatela, eta konpromisoa har dezatela, 2018. eta 2019. ekitaldietan, aipatutako saneamendua egiteko beharrezkoa den zenbatekoa bideratzeko”.

Eguzkik gogorarazi duenez, “erakundeek sei urte baino gehiago daramatzate lan horiek atzeratzen”, nahiz eta Europako Zuzentaraua (91/271/CEE Zuzentaraua) betetzen ez dutela jakin. “Asko hitz egiten dute badia bere onera ekartzeari buruz, baina badia benetan biziberritzeko, itsasora zuzenean isurtzen diren ur zikinak bideratu behar dira lehenik eta behin”, kexatu dira. Pasai Donibaneko saneamenduak adostasun instituzionala, politikoa eta soziala lortu du hasieratik baina lanak ez dituzte egiten. Eguzkik dio ingurumen arazo bat dela eta ezin dela gehiago itxaron. “Ez da nahikoa bainua debekatzea (debeku hau ez baita betetzen). Pozoitzen ari gara kutsatutako arrantzarekin eta infekzio-iturri diren ur zikinek botatzen duten usainarekin”, ohartarazi dute. Eguzkiren arabera “mozio hau azken aukera da egiaztatzeko finantzazioaren arduradunak diren erakundeek lan horiek egiteko konpromiso irmoa” dutela, eta ez “Donibaneko bizilagunen aldarrikapenak isilarazteko estrategia bat”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.