Bertsolarien BEC-eko finalera, Mazedonia Fruitbol-ekin

Mazedonia Fruitbol taldeko kideek Tiñelun jarri dituzte salgai bidairako tiketak. BECerako sarrera bakoitzak bere kabuz eskuratu behar du.

Urko Etxebeste Petrirena

Lezo

2017/12/06

Mazedonia Fruitboleko kideak, ekaineko futbito txapelketarako eratu zuten taldeetako batean.

Hilaren 17an, Barakaldoko Bilbao Exhibition Centren (BEC), Bertsolaritza Txapelketa Nagusiko finala jokoan izango da. Lezon autobusa antolatu dute bertara joateko, Mazedonia Fruitbol taldeak zehazki. Autobusean izena emateko zerrenda Tiñelun dago. Bidaia goiz-goizean hasiko dute. Izan ere, hilaren 17ko goizean hasiko da finala. Hortaz, Lezotik irteera 07:15ean (Ijurkotik) egingo dutela zehaztu dute taldekideek. Adi: BECerako sarrerak ez dituzte salgai taldekoek, bakoitzak bere kabuz lortu behar ditu. Lezoarrek egin dutena izan da BECera joateko baliabide bat eskaini. Helburu bikoitzarekin. Lehen helburua, bistakoa: nahi duen orok, autoa aparte utzita, bertsolaritzaren festara joateko aukera izatea. Bigarrena, taldeari eragiten diona: azken bi urteetan ekaineko Imanol Artola futbito oroitaldian parte hartu du Mazedonia Fruitbolek; hasieran talde batekin, aurten birekin. Hain handia da taldea lortzen ari den atxikimendua, lezoar gehiagok osatu nahi dituztela taldeak haien babespean. Baina kamisetak behar. Hortaz, elastikoak erosteko izango da BECeko bidaiatik atera dezaketen diru etekina. Bi urte dira lezoar talde bat bildu zela, askotariko adin, sexu eta girokoak. Euren asmoa zen Imanol Artola oroitaldiari ekarpen propioa egitea, elkartasun-kirol jarduera horri lehiakortasunetik haragoko zentzua ematea. Talde mistoak sortu zituzten, futbolaz gozatzeko beste era bat badagoela nabarmen utziz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.