Kirolean ere, zer ikusi, hura ikasi
Pasaia Osorik Bizitzeko kanpainaren barruan, kirolari ezagunak herriko taldeetako entrenamendu saioak gidatzen ari dira, euskaraz, hizkuntz ohiturak aldatze aldera.
Orioko prestatzailea Trintxerpeko arraunlari gazteekin, entrenamendua gidatzen.
«Arraunaz hitz egin eta arraunean aritu euskaraz egin daiteke» Jon Salsamendi Orioko entrenatzailea«Ez dakit entrenamenduetan -eta euskaraz egiten duzuen…», jarraitu du Salsamendik. «Ni toki askotan izan naiz, eta euskaldunak izanda ere, askotan ez dugu euskaraz egiten», aitortu du Orioko prestatzaileak. Baina zaila izanda ere joera horri buelta eman dakiokeela sinetsia heldu da Salsamendi Trintxerpera, besteak beste, Bermeon eta Orion antzeko esperientzietan parte hartu duelako. Gazte pasaitarrei ere hori transmititu nahi die: «Gaur jarduera hau euskaraz egingo dugu. Helburua da, entrenamendu bat izango litzatekeena euskaraz egitea, eta konturatzea arraunaz hitz egin eta aritu daitekeela euskaraz». Salsamendiren ustez, «lehen hitza beti euskaraz» egitea eta «naturaltasunez» jokatzea dira gakoak, «egoerak behartu gabe», eta beste arraun klubetan helburu antzekoekin egin dituzten lanketetan, hiztegiarekin ahalegin berezia egin izan dutela kontatu du. Bermeon zebilela egin zutena gogorarazi du: «Guk egin genuen, erdaraz erabiltzen zena euskaratu, eta ondoren bermeotarrez ere jaso». Hiztegi xume bat osatu zuten, baina eguneroko lanerako oso erabilgarria. Gerora antzeko bertsio bat osatu zuten Orion, eta orain, Trintxerpeko prestatzaileen esku utzi du. Euskarazko jatorrizko esamoldeak berreskuratu, hitz teknikoak euskaratu, eta tokian tokiko aldaeretara edota euskalkira moldatu. Saioaren helburua, baina, ez da gazteak hitz aspertuekin gogaitzea. Euskaraz jakin badakite, eta arrauna bezain beste edo gehiago maite dute hizkuntza. Beraz, zer hoberik biak uztartzea baino. Entrenamenduari ekin dio Salsamendik, arraunaz hitz egiteari: «Hau esanda, txapa gehiago ez luzatzeko, aktibitatearekin hasiko gara. Ez daude arraunlari txarrak edo onak. Lana eta konpromisoa. Horrek egiten du arraunlari bat ona edo ez hain ona…. ». Gazteak adi daude, estropada hastekotan denean bezala, jotzeko prest. Badute bere burua non islatu, euskaraz, jator… eta bizi olatuari.
Itsaso Andueza, Illunbe Arraun Elkarteko zuzendaritzako kide, Jon Salsamendi aurkezten.
Gaur, Ion Kamio hockey jokalariaren txanda
Pasaian arraunak tiradizoa baduela ez dago zalantzarik, baina ez da, noski, haur eta gazteen artean arrakasta duen kirol bakarra. Trintxerpen, zehazki, oso sustraituta dago belar hockeya, eta gaur, kirol horren zaleentzat erreferente Ion Kamio izango da bertako jokalariekin. 18:00etan, Azkueneko pistetan, entrenamendu saioa gidatuko du. Ion Kamio, Atletico San Sebastian taldeko Ohorezko Mailako jokalaria da, eta besteak beste, Gipuzkoako eta euskal hockey federazioen zuzendari teknikoa. Eta izango dira bisita gehiago. Datak zehazteke, beren bisita baieztatu duten kirolarien artean daude, baita ere, Xabier Santxo pilotaria eta Josu Andueza arraunlari ohia. Horrez gain, Pasaia Osorik Bizitzeko kanpainaren bultzatzaileek iragarri dute, aurrerago Realeko futbol jokalariekin entrenamendu saioak antolatuko dituztela.
