Antzerkia, hitzaldiak, tailerrak eta hausnarketarako espazioak zabalduko ditu, feminismoaz, sistema heteropatriarkalaz eta hori iraultzeko beharraz mintzatzeko.
Martxo Morea antolatu du Kolpe Moreak taldeak.
Martxo Morea antolatu du Oreretako Kolpe Morea talde feministak, bosgarrenez. Martxoaren 8an, Emakumeen Nazioarteko Egunean egun osoko egitaraua antolatu du Oreretako Mugimendu Feministak, baina hilabete osoa ere morez jantziko du Kolpe Moreak. Horrenbestez, antzerkia, hitzaldiak, tailerrak eta hausnarketarako espazioak zabalduko ditu, feminismoaz, sistema heteropatriarkalaz eta hori iraultzeko beharraz mintzatzeko.
Ekitaldi nagusiak Martxoaren 8ari begira antolatu ditu mugimendu feministak, eta horiekin bat egin du Kolpe Moreak ere. Emakumeak planto egitera deitu dituzte egun horretan, zaintzan, lantegietan, kontsumoan, eta ikastetxeetan, eta besteak beste, hezkuntza publiko, laiko eta feminista, zaintza lanak berdintasunean banatzea, tasa arrosa ezabatzea, eta lan bera egiteagatik berdina kobratzea eskatuko dute. Baina salaketek ere izango dute tartea, eta besteak beste testu liburuetan emakumeak ezabatu izana, edota kontsumo arduragabeak beste herrialdetako emakumeen heriotza dakarrela ohartaraziko dute.
Auto karabanak zabalduko du Martxoaren 8ari lotuta antolatutako ekintza sorta. Azken hori, Pontikatik abiatuko da 11:30ean, eta 12:30ean manifestazioa abiatuko da Herriko plazatik. Bazkaria ere antolatu dute, Emma Goldmanen esaldia bere eginda, dantzarik gabeko iraultzarik ez dagoelako. Manifestazioa egingo dute arratsaldean ere. Herriko plazan bilduko dira horretarako, 19:30ean.
Martxo Morearen egitaraua
- Martxoak 4, igandea: Hamaika Buelta Antzerki Taldearen Mila ezker, 19:00etan Niessen Kulturgunean.
- Martxoak 10, larunbata: Zergatik naiz feminista? Gure genealogia feminista emakumeentzako tailerra, 11:00etan Gaztetxean.
- Martxoak 16, ostirala: Euskal gatazka feminismotik hitzaldia Zuriñe Rodriguezen eskutik, 18:30ean Gaztañoko lokal berrian.
- Martxoak 23, ostirala: landare elkartean afari feminista, 21:00etan.
Martxoaren 8ko egitaraua
- 11:30: Kotxe karabana Pontikatik abiatuta.
- 12:30: Manifestazioa Herriko plazatik abiatuta.
- 14:00: Bazkaria Txintxarrin. (Izena Arkaitzan eman behar da eta bazkariaren egunean ordaindu).
- 17:00: Tribial feminista Txintxarrin.
- 19:30: Manifestazioa Herriko plazatik abiatuta.
