Intxaurrandietak eta Errazkinek Madrilen deklaratu dute gaur

Ainhoa Intxaurrandieta izan da deklaratzen lehena eta errauste planta eraikitzeak "ondorio ekonomiko larriak" eragingo lituzkeela adierazi du.

olatz mitxelena

Lezo

2018/04/12

Gaur eguerdian Lezon elkarretaratzea egin dute EH Bilduk deituta; 20:00etarako protestaldiak antolatuta daude herri guztietan.

Ondorioen aurkezpena beste saio baterako utzita bukatutzat eman dute gaur Madrilen Ainhoa Intxaurrandieta eta Iñaki Errazkinen kontrako epaiketa. 10:00etan hasi da epaiketa Espainiako Kontuen Auzitegian, eta Intxaurrandieta izan da deklaratzen lehena. Fiskalaren galderei erantzunez adierazi du errauste planta eraikitzeak lanen eteteak eragindako kalte ordainak baino kalte ekonomiko larriagoak eragingo lituzkeela. Norabide berean, Errazkinek adierazi du “Errauste planta eraiki izan balitz, guztiz defizitarioa” litzatekeela. Eta galdera batekin amaitu du bere deklarazioa: “Bideragarria al zen azpiegitura? Hori da kontua”. Denis Itxaso egungo Kultura diputatuak ere deklaratu du, lekuko gisara, eta esan du GHK-k errauste planta geldiaraztea erabaki zuenean mahai gainean zeudela hainbat txosten, “kontratua etetearen ondorio ekonomikoez” ohartaraziz. Elkartasun mezu ugari Intxaurrandieta eta Errazkin Martin Garitano lagun izan dute Madrilen, baita Garbiñe Errekondo diputatu ohia eta Eneko Etxeberria Azpeitiko alkatea ere. Lezon, bestalde, elkarretaratzea izan da gaur eguerdian, EH Bilduk deituta, eta arratseko 20:00etan kazeroladak eta karteladak egingo dira herri guztietako plazetan Gipuzkoa Zutik-ek antolatuta.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.