Ekainaren 10eko giza katera iritsi baino lehen, hainbat ekitaldi antolatu ditu Lezoko Gure Esku Dago-k. Astelehenero, bulegoa zabalik Kultura aretoan.
Gezalan larunbatean egin zen aurkezpenaren une bat. Argazkia: GED Lezo.
Lezoko Gure Esku Dago-ko (GED) kideek ekainaren 10ean Donostia, Bilbo eta Gasteiz lotuko dituen 201,9 kilometroko giza katea aurkeztu zuten, Gezala Auditoriumean egindako ekitaldian. Egun horretan egin beharrekoez, eta haraino iristeko egin beharreko bideaz hitz egin zuten besteak beste.
Hasteko, datua: Lezoko biztanleei, ekainaren 10ean, Zarautz eta Getaria arteko zatian egotea egokitu zaie, zehazki, 500 lezoar nahi dituzte herriari egokitu zaion kilometroan.
Bertan egoteko, aldez aurretik izena eman behar da. Hori egiteko aukera erraza dute lezoarrek: astelehenero bulegoa zabalduko dute Kultura aretoan, 18:30etik 20:00etara, izen emateak jasotzeko. Herritarrak izena ematera eta beraz, ekainaren 10eko giza katean parte hartzera animatu dituzte Lezoko Gure Esku Dago-ko kideek.
Bestelakoak, aurretik
Ekainaren 10era iritsi aurretik, ordea, giroa berotze aldera eta saretze bidea indartzeko, hainbat ekitaldi antolatu ditu herriko GEDek. Tankera anitzeko jarduerak dira, herritar orori zabalik. Honakoak dira:
- Maiatzaren 13an (igandea), 09:30ean plazatik abiatuta, Jaizkibelera mendi martxa.
- Maiatzaren 26an, (larunbata) Klik Egunaren harira, 19:00etan ekitaldi nagusia.
- Ekainaren 2an (larunbata), 16:30ean, Gartxok lana ikusgai Gezalan eta ondoren Asisko Urmenetaren emanaldia.
- Ekainaren 8an (ostirala), 20:00etan, pintxo potea herritik zehar.
