Inbertsio horien zati handiena Errenteriak eta Pasaiak jasoko dute. Horren barruan, Lezo-Donibane bidegorriaren bigarren zatiarentzat diru partida dago.
Oarsoaldeko alkateak eta aldundiko ordezkariak, atzo, hitzarmenaren aurkezpenean.
Gipuzkoako Foru Aldundiak eta Oarsoaldeko lau udalek hitzarmena sinatu zuten atzo, 1,95 milioiko inbertsioak egiteko eskualdean. Udalek proposatutako hainbat jarduera dira diru hori jasoko dutenak. Aldundiak adierazi duenez, hitzarmena “Pasaiako badiaren leheneratze integralerako eskualde estrategiaren barruan” kokatzen da.
Kopuru horretatik 839.675 euro Errenteriako Udalak jasoko ditu. Galtzarabordako udal kiroldegian energia kontsumoa murrizteko eta argiteria adimenduna instalatzeko, Galtzarabordan igogailu publikoa eraikitzeko, Alabergan bizikleten bidea eraikitzeko, eta kultur ekipamenduetan inbertsioak egiteko erabiliko dute.
Pasaiak 700.000 euro jasoko ditu hitzarmenaren bidez. Donibaneko gaztelekuan eta Trintxerpeko Euskadi etorbideko igogailuan birgaitze lanak egiteko, Donibaneko hirigune historikoko igogailuen sarrerak hobetzeko, Gran Sol kaleko (Trintxerpen) bide larrialdiko pisua egokitzeko, edo besteak beste, Antxoko topoko arkuak berreskuratzeko erabiliko dute.
Lezoko inbertsioa, 230.000 eurokoa, Lezo-Donibane bidegorriaren bigarren zatia (lehena egina dago; hiru zatitan banatu dute obra) egiteko erabiliko dute. Aldi berean, Altamirako igogailuko lanak ere finantzatuko dira diru zati horrekin.
Oiartzunera 185.000 euroko partida bideratu dute. Arditurriko bidegorrian Oiartzungo Udala egiten ari den hobekuntzak lagunduko dituzte diru horrekin, besteak beste, bertan dauden tunelak hobetzen.
Markel Olano ahaldun nagusiaren arabera, Pasaialdea “zonalde estrategikoa eta boteretsua da etorkizunera begira gure lurraldearentzat, eta legealdi hasieran gure gain hartu genuen hitzarmena betetzen ari gara”. Bide horretan, Pasaialdeako Kudeaketa Plan Estrategikoa 2015-2019 egitasmoa, nahiz Portuko Plan Bereziaren onarpena kokatu ditu Olanok. Eta horien barruan, zehaztasunetan sartuz, Pasaian egin asmo den Adinberri adineko pertsonei zuzendutako zentroa, eta horren inguruan izango den berrikuntza gunea nabarmendu ditu ahaldun nagusiak. Hala, legealdi honetan aldundiak Pasaian 7,8 milioiko inbertsioa egin duela jakinarazi du Olanok.
Marisol Garmendia Mugikortasun eta Lurralde Antolaketarako diputatua ere izan zen hitzarmenaren sinadura ekitaldian. Haren esanetan, aldundiak Oarsoaldeko herritarrekin duen konpromisoa indartu egin du hitzarmen berri horrekin, “akordioen eta adostasunaren gaineko estrategia jarri dugu abian, ez bakarrik udalekin, baita gainerako erakunde eta eragile ekonomiko eta sozialekin ere. Gauzak bide onetik doaz”.
