Emakume raketisten memoriak tokia izango du Mendekoste jaietan

Dokumentala, erakusketa eta partida antolatu dituzte.

olatz mitxelena

2018/05/15

Erakusketa partida jokatuko dute Bekoerrotan, Mendekostetako igandean, goizean.

Lehen emakume kirolari profesionalak izan ziren raketistak, eta azken urteetan haien memoria jasotzeko lan mardula egin da. Lezoko Udala aitortza horri batu nahi izan da eta emakume raketista haiei aitortza egiteko egitaraua ondu du Mendekoste jaietarako. Emakume raketisten inguruko erakusketa bat egongo da ikusgai hilaren 17tik (osteguna) 22ra bitartean, Lezoko Kultur Aretoan. 11:00etatik 13:00etara eta 17:00etatik 19:00etara bisitatu ahal izango da (asteburuan arratsaldez itxita). Hilaren 17an, ostegunean, Mendekoste jaien bezperan, gai berberearen gaineko dokumentala proiektatuko dute, 19:00etan , Kultur Aretoan, eta azkenik, hilaren 20ean, igandea, erakusketa partidua jokatuko dute, 10:45ean Bekoerrota kiroldegiko frontoian. Ondoko raketistek jokatuko dute: Miren Larrarte, Uxue Murillo, Susana Muneta, Maider Mendizabal, Nagore Martin eta Maria Saez. Lezoarrak tartean Emakume raketistak mundu guztian aritu ziren partidak jokatzen XX. mendeko hirugarren hamarkadan zehar, nagusiki; Madril, Bartzelona, Kuba eta Mexikon. Lezoar ezagun bat ere izan zen tartean, Koldobike Gezala ‘Kollo’ . Emakume raketista gehientsuenak euskaldunak ziren. 15-16 urterekin etxetik joan behar izaten zuten pilotan trebatu eta etxera dirua bidaltzeko. Intxaurrondoaren egurrarekin egiten zituzten erabiltzen zituzten erraketak eta larruzko pilotekin jokatzen zuten, gona eta mauka motzeko elastikoak soinean eta alpargatekin oinetan,guztia 36. Gerra bitartean. Gerra ondoren eman zuten bukatutzat raketisten ibilbidean, Pilota Federazioa sortu zutenean emakumeen lizentziak ez berritzea erabaki zutelako. Federazioaren esanetan, “raketa ez zen egokia emakumeentzat, ama izatea zelako lehentasuna”. Madrilen jokatu ziren modalitate honetako azken partiduak, 1980. urtean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.