"Ez dugu inpunitaterik eskatzen, justizia baizik"
Errenteria Irabazizek eta EH Bilduk epaiketa justua exijitu dute, bermeak izango dituena eta terrorismoaren akusazioa erabat arbuiatuko duena.
Errenteria Irabaziz eta Errenteria-Oreretako EH Bilduk elkartasuna adierazi diete datorren astelehen eta asteazkenean Espainiako Auzitegi Nazionalean epaituko dituzten gazteei, eta horien senide eta lagunei. Adierazpen bateratua egin dute gaur goizean bi alderdiek udaletxeko arkupeetan, eta “irmoki” salatu dute auziak duen “desproportzionaltasun juridikoa”.
Agerraldian bildu diren bi alderdiek Iruñean jazotako kale istiluak errefusatu zituztela ekarri dute gogora, baita azken hilabeteetan hainbat eragile sozial, epaile eta alderdik, istilu horiek bere esparru juridiko konkretuan, epaitu eta ebatzi behar direla, “Iruñeko Auzitegian, hain zuzen ere” aldarrikatu dutela. Inpunitaterik ez dutela eskatzen nabarmendu dute, “justizia baizik” eta errugabetasun presuntzioa “beti errespetatu” behar dela erantsi dute, “kontrakorik frogatzen ez den bitartean, inor erruduntzat jo gabe”.
Eskaera zehatza egin dute bi alderdiek, auzi horren gaineko konpetentzia “jurisdikzio arruntetara” itzularazi dezatela, “eta ez dadila Auzitegi Nazionalaren eskumenean geratu. Epaia legearen oinarrizko printzipio gidarietako baten interpretazioan kokatzea eskatzen dugu, hau da, garaiko errealitate soziala kontuan hartuta”. Epaiketa justua exijitu dute, bermeak izango dituena eta terrorismoaren akusazioa erabat arbuiatuko duena.
Astelehenean Oreretako hiru gazteen eta Beasaingo gazte baten kontra abiatuko duten epaiketa, “Espainiako Estatuan areagotzen ari den inboluzio demokratikoaren” testuinguruan kokatu dute bi alderdiek, bestalde, “eskubide sozial eta oinarrizko askatasunei dagokionean ematen ari den atzeranzko joeran”. Legeak eta horien gaineko interpretazioak testuinguru horretan kokatu dituzte, “dinamika atzerakoi horren testuinguruan, hain zuzen ere. Horren adibide, mozal legea, Europan dagoeneko gogorrenetakoa den zigor kodearen gogortzea, edo salbuespen egoeren aplikazioa ditugu. Adibide garbienetakoa, Espainiako Konstituzioaren 155. artikuluan oinarrituta irekitako bidea”.
“Autoritarismoak” ez duela amaierarik erantsi dute, “eskubide sozial eta oinarrizkoen galerara garamatza. Rap kantariak, tuiteroak, sindikalistak, politikoak edota herri eragileen atxiloketek erakusten dute hori”. Eskubide urraketa horien testuinguruan kokatu dute Ruben, Endika, Asier eta Julen, Errenteriako eta Beasaingo gazteen kontrako epaiketa, “salbuespen izaera duen Auzitegi Nazionalaren gisako tribunal batean egingo den epaiketa, judizialetik baino, politikotik gehiago duen tribunal batean, epaituko dituen ekintzak terrorismotzat kalifikatu dituen epaitegi batean. Argi eta garbi, Orereta-Errenteriako EH Bildu eta Errenteria Irabazizeko kideok partekatzen ez dugun ingeniaritza juridiko batek erabakita”.
Kezka azaldu dute, “neurri atzerakoiek” ireki dezaketen norabidearekin: “Kezkatzen gaitu, herri honen historiak argi erakutsi digulako hasiera batean salbuespenez herritar talde bati aplikatzen zaiona, bere horretan larria dena, gizarte osora zabaltzen dela ondoren. Ez dezagun beste aldera begiratu, eta ez gaitezen neutralak izan galera demokratiko honen aurrean”. 
