Lezon birziklapenak izan duen gainbeheraren aurrean kezka azaldu du Lezon Ondo Ai Ginenek, eta hura gelditzeko ezer egiteko prest ez egotea egotzi dio Martiarenari.
Guillermo Lazon auzoko auzo konposta gunea hutsik dagoela oraindik salatu dute. Argazkia: Lezon Ondo Ai Ginen.
Lezon Ondo Ai Ginen taldeak gogor salatu du Jesus Maria Martiarena alkatearen jarrera. Izan ere, taldeak salatu duenez, alkatea galarazten ari da Gillermo Lazon auzoan auzo konposta gunea jartzeko zortzi familiek egindako eskaera, nahiz eta horretarako, arazo teknikorik ez dagoen eta udal teknikoen iritziaren kontra egiten ari den. Azken horiek auzo konposta gunea jartzeko lau proposamen aurkeztu dizkiote alkateari Lezon Ondo Ai Ginen taldeak jakinarazi duenez, “baina guztiei ezezkoa eman die Martiarenak”.
Martiarenaren jarrera salatu du taldeak, baita Jose Angel Sanchez PSE-EEko zinegotzi bakarra eta Ingurumen zinegotziarena, “udal teknikoez aparte inongo zinegotzirik ez da jarri harremanetan bizilagunekin, eta horren harira, bereziki aipatu nahi dugu PSEko ingurumen delegatu berria. Ez dugu oso ondo ulertzen bere papera halako egoera baten aurrean ezer ez badu egiten. Zertarako du orduan delegatu soldata?”.
Lezon birziklapenak izan duen gainbeheraren aurrean kezka azaldu du Lezon Ondo Ai Ginenek, eta hura gelditzeko ezer egiteko prest ez egotea egotzi dio Martiarenari, “jarrera hauekin alkatea behin eta berriro erakusten ari da ez duela hondakinen birziklatzean sinisten”.
Duela urtebete, iazko udaberrian, auzo konposta gune bat jartzeko eskaera egin zuten Guillermo Lazon kaleko zortzi familiek udalean. Baiezkoa eman ziela Hirigintza zinegotziak esan du Lezon Ondo Ai Ginen taldeak eta udal tekniko eta bizilagunekin gunea jartzeko tokia adostu zutela. Pasa den urtarrilean san Pedro auzoko konposta gunea desmuntatu eta Guillermo Lazon auzora eraman zuen udalak, San Pedro auzoan konposta egiten zuten familiak Lopeneko gunera bideratuta. Urtarrilaren 25ean, Guillermo Lazonen konposta gunea jarri berritan alkateak hura kentzeko agindua eman zuela erantsi du taldeak, “horrela jakinarazi zien bizilagunei, baina egun batzuen buruan eta presio batzuen ondorioz alkateak gunea lekuz aldatuko zuela adierazi zuen”.
Ordutik, udal teknikoek hiru toki proposamen egin dizkiotela alkateari esan du Lezon Ondo Ai Ginenek, “denei ezezkoa eman die ordea, eta teknikoak bizilagunekin jarri dira harremanetan, etsituta”.
Gaur gaurkoz lehengo tokian dago auzo konposta gunea, hutsik.
